မြန်မာနိုင်ငံရှိ ကျွန်ုပ်တို့သည် လူပျိုအပျိုဖော်ဝင်လာချိန်ကတည်းက မိမိ၏ လိင်စိတ်ဝင်စားမှုသည် လိင်တူအပေါ်တွင်သာ ရှိသည်ကို သတိပြုမိကြပါသည်။ သို့သော် ကျွန်ုပ်တို့လိင်တူချစ်သူများအဖို့ အများနှင့်မတူပဲ ဖြစ်နေသည့်အတွက် ပျိုဖော်ဝင်ချိန် ဇီဝခန္ဓာပြောင်းလဲမှု ဖြစ်ပေါ်လာစဉ် ရှုပ်ထွေးနားမလည်မှုများအပေါ် နီးစပ်ရာကို မေးမြန်းရမည်ကို ကြောက်လန့်ခြင်း၊ မည်သူကို မေးရမည်ကို မသိခြင်း နှင့် မည်သည်ကို ရှာဖွေဖတ်ရှုရမည်ကို ရှာမတွေ့ (သို့) လက်လှမ်းမမှီခြင်း စသည်တို့ကြောင့် မေးခွန်းများ ပြည့်နှက်စွာဖြင့် ငယ်စဉ်ဘဝကို ရုန်းကန်ကြရပါသည်။ ဤကဲ့သို့ဖြင့် အဖြေရှာမရသည့်အခါ မိမိအပေါ် ကိုယ့်ကိုယ်ကိုယုံကြည်မှု တည်ဆောက်ရန်ခက်ခဲခြင်း၊ ဘဝကိုနားမလည်ခြင်း၊ ကိုယ့်ကိုယ်ကို လက်မခံနိုင်ခြင်း နှင့် စိတ်ဓာတ်ကျဆင်းခြင်း အစရှိသည့် အဆိုးရွားဆုံးအခြေအနေများကို တွေ့ကြုံနိုင်မည့် အန္တရာယ်များကို လိင်တူချစ်သူလူငယ်/လူကြီးအချို့ဟာ ကျော်ဖြတ်ရသည့် အဖြစ်မျိုး ရရှိလာနိုင်ပါသည်။ ထို့ကြောင့် ထိုကဲ့သို့ အဖြစ်များမှ ကာကွယ်နိုင်ရန် စစ်မှန်ပြီး အကျိုးပြုသော ဗဟုသုတ နှင့် သိရှိခြင်းများကို ရရှိကာ မိမိ၏အခြေအနေကို ပိုမိုနားလည်ပြီး မိမိဘဝကို အများနည်းတူ ပုံမှန်အတိုင်း ဖြတ်သန်းနိုင်ရန် ရည်ရွယ်ချက်ဖြင့် လိင်စိတ်တိမ်းညွတ်မှု နှင့် လိင်တူချစ်ခြင်းဖြင့်ပက်သက်သော ဆေးပညာ၊ သိပ္ပံသုတေသန နှင့် စိတ်ပညာအရ တရားဝင် သတ်မှတ်ပြဠာန်းမှုကို ရေးသားပေးလိုက်ရပါသည်။ ဤပြဠာန်းမှုသည် တစ်ကမ္ဘာလုံးမှ အသိအမှတ်ပြုထားသော ပင်တိုင်သဘောတူညီမှုဖြစ်သည့် အမေရိကန် စိတ်ပညာအသင်း (American Psychological Association) ၏ ပြဠာန်းချက်ကို အင်္ဂလိပ်မှ မြန်မာဘာသာသို့ ဆီလျှော်အောင် ပြန်ဆိုပေးထားခြင်းပင် ဖြစ်ပါသည်။ ထို့ကြောင့် လိင်တူချစ်သူများ နှင့် ကျားမပြောင်းသူများ၏ စိတ်ကျန်းမာရေး၊ ကိုယ်ကျန်းမာရေး၊ လူမှုကျန်းမာရေး စသည်တို့ ပြီးပြည့်စုံအောင် ရရှိနိုင်ပြီး လူတန်းစေ့ နေနိုင်ရေးအတွက် မလိုမှန်းထားမှုများ နှင့် ခွဲ့ခြားဆက်ဆံမှုများ ပပြောက်ရန်အလို့ငှာ အမြင်မှန် ဗဟုသုတများကို ဝေမျှခြင်းဖြင့် အတူလက်တွဲဆောင်ရွက်ကာ ပါဝင်နိုင်ပါသည်။
နိဒါန်း
၁၉၇၅ ခုနှစ်ကတည်းမှစ၍ အမေရိကန် စိတ်ပညာအသင်းသည် စိတ်ပညာရှင်များအား အမျိုးသားချင်းချစ်သူ၊ အမျိုးသမီးချင်းချစ်သူ နှင့် ကျားမနှစ်မျိုးလုံးချစ်သူတို့၏ လိင်စိတ်တိမ်းညွှတ်မှုအား စိတ်ရောဂါဟု သတ်မှတ်ထားသောအမဲစက်ကို ပယ်ဖျက်ရန် ရှေ့တန်းမှ ဦးဆောင်ဖို့ နှိုးဆော်ခဲ့ပါသည်။ စိတ်ပညာဗေဒ နယ်ပယ်သည် လူများ နှင့် လူအုပ်စုများ၏ ကျန်းမာသုခနှင့်အတူတကွ ထိုကျန်းမာသုခကို ထိခိုက်မည့် အန္တရာယ်များကို အလေးထားပါသည်။ အမျိုးသားချင်းချစ်သူ၊ အမျိုးသမီးချင်းချစ်သူ နှင့် ကျားမနှစ်မျိုးလုံးချစ်သူဟု မိမိကိုယ်ကိုသတ်မှတ်သူများသည် ခွဲခြားဆက်ဆံခံရခြင်း နှင့် မလိုမုန်းထား ပြုခံရခြင်းတို့ကြောင့် စိတ်ပိုင်းဆိုင်ရာ ထိခိုက်မှုများကို ပုံမှန်ခံစားရလေ့ရှိပါသည်။ ဤပြဠာန်းချက်သည် လိင်စိတ်တိမ်းညွှတ်မှု အကြောင်းနှင့် နှင့် မိမိကိုယ်ကို အမျိုးသားချင်းချစ်သူ၊ အမျိုးသမီးချင်းချစ်သူ နှင့် ကျားမနှစ်မျိုးလုံးချစ်သူဟု သတ်မှတ်သူများအပေါ် ခွဲခြားဆက်ဆံခြင်း နှင့် မလိုမုန်းထားပြုခြင်းတို့၏ သက်ရောက်မှုများအကြောင်းတို့ကို ပိုမိုကောင်းမွန်စွာ နားလည်လိုသူများ အတွက် တိကျသော အချက်အလက်များကို ထောက်ပံပေးရန် ရည်ရွယ်ပါသည်။
လိင်စိတ်တိမ်းညွှတ်မှု (Sexual Orientation) ဆိုသည်မှာ အဘယ်နည်း။
လိင်စိတ်တိမ်းညွှတ်မှုဆိုသည်မှာ ယောက်ျား၊ မိန်းမ သို့မဟုတ် နှစ်ဦးစလုံးအပေါ်တွင် စိတ်ခံစားချက်၊ မေတ္တာစိတ် နှင့် လိင်စိတ် အစရှိသည်တို့မှ အားလုံး (သို့) တခုခု စွဲမက်မှု ရှိနေခြင်းကို ဆိုလိုပါသည်။ လိင်စိတ်တိမ်းညွှတ်မှုဆိုသည်မှာ ထိုစွဲမက်မှုများအပေါ်မူတည်၍ ဖြစ်ပေါ်လာသော လူတစ်ဦး၏ မိမိကိုယ်ကိုသတ်မှတ်မှုအပြင် ထိုကဲ့သို့ ထိုက်လျောက်ပတ်စွာ ပြုမှုနေထိုင်ပုံ နှင့် ထိုကဲ့သို့သောသူများ၏ အသိုင်းအဝိုင်းတွင် ပေါင်းသင်းပါဝင်မှု တို့ဖြင့် မိမိကိုယ်ကိုသတ်မှတ်မှုကိုလည်း ခေါ်ပါသည်။ ဆယ်စုနှစ်ပေါင်းများစွာ ပြုလုပ်ပြီးခဲ့သော သုတေသနအများအပြားမှ ညွန်ပြသည်မှာ လိင်စိတ်တိမ်းညွှတ်မှုသည် နယ်ပယ်တစ်ကြောလုံးတွင် အတိုင်းအတာအမျိုးမျိုး ရှိနိုင်သည်။ ဆိုလိုသည်မှာ တိမ်းညွှတ်မှုသည် ဆန့်ကျင်ဘက်လိင်ကိုသာ လုံးဝသီးသန့်စွဲမက်မှုမှအစ လိင်တူကိုမှ လုံးဝသီးသန့်စွဲမက်မှုအဆုံး ရှိနိုင်ပါသည်။
သို့သော် လိင်စိတ်တိမ်းညွှတ်မှုကို ပုံမှန်အားဖြင့် အမျိုးအစားသုံးမျိုးဖြင့် ဆွေးနွေးလေ့ရှိကြသည်။ (၁) ဆန့်ကျင်ဘက်လိင်ချစ်သူ (အခြားလိင်အပါ် စိတ်ခံစားချက်၊ မေတ္တာစိတ် (သို့) လိင်စိတ်စွဲမက်မှု ရှိနေခြင်း)၊ (၂) လိင်တူချစ်သူ (သို့) အမျိုးသားချင်းချစ်သူ/အမျိုးသမီးချင်းချစ်သူ (မိမိ၏ ကိုယ်ပိုင်လိင်နှင့်တူသော လိင်အပေါ် စိတ်ခံစားချက်၊ မေတ္တာစိတ် (သို့) လိင်စိတ်စွဲမက်မှုရှိနေခြင်း) (၃) ကျားမနှစ်မျိုးလုံးချစ်သူ (ယောက်ျားကော မိန်းမအပေါ်ပါ စိတ်ခံစားချက်၊ မေတ္တာစိတ် (သို့) လိင်စိတ်စွဲမက်မှုရှိနေခြင်း)။ ဤပြုမှုနေထိုင်ပုံ နှင့် စွဲမက်ပုံ အမျိုးမျိုးတို့သည် ကမ္ဘာတဝှမ်းရှိ နိုင်ငံအမျိုးမျိုးနှင့် ယဉ်ကျေးမှုအမျိုးမျိုးတို့တွင် ဖော်ပြထားပြီးပြီ ဖြစ်သည်။ ယဉ်ကျေးမှု အတော် အများသည် ဤစွဲမက်မှုများကို ပြသသော လူများကို မည်သူမည်ဝါသတ်မှတ်သော အခေါ်အဝေါ် အမျိုးမျိုးရှိလေ့ရှိသည်။ အင်္ဂလိပ်စကား နှင့် အမေရိကန်နိုင်ငံတွင် အသုံးများလေ့ရှိသော အခေါ်အဝေါ်များမှာ lesbian (လက္စဘီးယန်း) (အမျိုးသမီးအချင်းချင်းစွဲမက်သူ)၊ gay (ဂေး) (ယောက်ျားအချင်းချင်းစွဲမက်သူများ) နှင့် bisexual (ဘိုင်) (ကျားမနှစ်မျိုးလုံးစွဲမက်သူ) တို့ဖြစ်ကြသည်။ သို့သော် အချို့လူများသည် အခြားအခေါ်အဝေါ်ကို သုံးချင်သုံးနိုင်သလို ဤအခေါ်အဝေါ်များကို လုံးဝမသုံးသည်လည်း ဖြစ်နိုင်သည်။
လိင်စိတ်တိမ်းညွှတ်မှုသည် လိင် (Sex) နှင့် ကျားမသတ်မှတ်မှု (gender) တို့နှင့် ကွဲပြားပါသည်။ ဇီဝလိင် (Sex) ဆိုသည်မှာ မွေးရာပါ ခန္ဓာကာယ၊ ဇီဝကမ္မ နှင့် မျိုးရိုးဗီဇတို့၏ ရလာဒ်ကြောင့် အထီး (သို့) အမ လိင်အင်္ဂါ လက္ခဏာများရှိခြင်းကို ခေါ်ပါသည်။ ကျားမသတ်မှတ်မှု (gender) ဆိုသည်မှာ စိတ်ပိုင်းဆိုင်ရာအရ မိမိကိုယ်ကို ယောက်ျား (သို့) မိန်းမ အဖြစ် သတ်မှတ်မှုကိုခေါ်ပြီး၊ လူမှုကျားမကဏ္ဍ (social gender role) ဆိုသည်မှာ ပတ်ဝန်းကျင် ယာဉ်ကျေးမှုမှ သတ်မှတ်ထားသော ယောက်ျားဆန်သော (သို့) မိန်းမဆန်သော အပြုအမူများကို ဆိုလိုသည်။
လိင်စိတ်တိမ်းညွှတ်မှုကို ဇီဝလိင်၊ ကျားမသတ်မှတ်ပုံ သို့မဟုတ် အသက်အရွယ်စသည်တို့ ကဲ့သို့ပင် လူတစ်ဦးတစ်ယောက်၏ တစ်ကိုယ်ရေလက္ခဏာသပ်သပ်တစ်ခုဟုသာ သာမာန်တွင် ဆွေးနွေးကြ လေ့ရှိသည်။ ဤရှုထောင့်မှာ မပြည့်စုံပါ။ အဘယ့်ကြောင့်ဆိုသော် လိင်စိတ်တိမ်းညွှတ်မှုသည် အခြားသူများ၏ ဆက်ဆံရေးအပေါ်ကိုမူတည်၍လည်း သတ်မှတ်ရသောသောကြောင့် ဖြစ်သည်။ လူများသည် ၎င်းတို့၏ လိင်စိတ်တိမ်းညွှတ်မှုကို အခြားသူများနှင့် ပြုမှုနေထိုင်ပုံတို့နှင့် ပြသလေ့ရှိသည် (ဥပမာ ရင်းနှီးစွာသွားလာခြင်း၊ လက်ကိုင်ခြင်း၊ ပွေ့ဖက်ခြင်း စသည်)။ ထို့ကြောင့် လိင်စိတ်တိမ်းညွှတ်မှုသည် မေတ္တာရှိမှု၊ တွယ်တာမှု နှင့် ရင်းနှီးမှုတို့ကို ဝေမျှလိုသော ခံစားမှုများဖြင့် တည်ဆောက်ထားသော လူနှစ်ဦးကြား ရင်းချာသောဆက်ဆံရေးနှင့် ပက်သက်ဆက်စပ်နေသည်။
လိင်စိတ်အပြုအမူများအပြင် လူနှစ်ဦးကြား ဤအနှောင်အဖွဲ့များသည် ခန္ဓာတဏှာစိတ်မပါသော ချစ်ခြင်းမေတ္တာများ၊ ရည်မှန်းချက်ပန်းတိုင်များ နှင့် တန်ဖိုးထားမှုများ တူညီမှု၊ တစ်ဦးကိုတစ်ဦး ဖေးမမှု နှင့် စဉ်ဆက်မပျက် သစ္စာရှိမှုတို့လည်း ပါဝင်သည်။ ထို့ကြောင့် လိင်စိတ်တိမ်းညွှတ်မှုသည် လူတစ်ဦးတစ်ယောက်ထဲအတွင်းရှိ တစ်ကိုယ်ရေလက္ခဏာ သပ်သပ်သာ မဟုတ်ပါ။ သို့ဖြစ်၍ လိင်စိတ်တိမ်းညွှတ်မှုသည် လူတစ်ယောက်မှ မိမိကိုယ်ကို သတ်မှတ်ရာတွင် အရေးပါသော အစိတ်အပိုင်းဖြစ်သည့် မေတ္တာမျှဝေမှုကို ကျေနပ်စွာ ဖြည့်စည်းပေးနိုင်သော ဆက်ဆံရေးကို ရှာဖွေနိုင်မည့် လူအုပ်စုတစ်စုတွင် ဆန့်ဝင်ခြင်းကိုလည်း ဆိုလိုပါသည်။
မိမိကိုယ်ကို အမျိုးသမီးချင်းချစ်သူ၊ အမျိုးသားချင်းချစ်သူ (သို့မဟုတ်) ကျားမနှစ်မျိုးလုံးချစ်သူ ဖြစ်သည်ဟု မည်ကဲ့သို့ သိနိုင်ပါသလဲ။
လက်ရှိ သိပ္ပံပညာ နှင့် ဆေးပညာ နားလည်မှုများအရ လူကြီးဘဝ လိင်စိတ်တိမ်းညွှတ်မှု၏ ပင်မအခြေတည်မှုသည် သာမာန်တွင် ကလေးငယ်စဉ်ဘဝနှောင်းပိုင်းနှင့် ပျိုဖော်ဝင်ချိန်အစဦးပိုင်း တို့တွင် စတင်ပေါ်ပေါက်လာသည်ဟု ဆိုပါသည်။ ဤ စိတ်ခံစားမှု၊ မေတ္တာစိတ် နှင့် လိင်စိတ် စွဲမက်မှု ပုံစံများသည် လိင်မှုကိစ္စ အတွေ့အကြုံမရှိပဲနှင့်လည်း ပေါ်ထွက်လာနိုင်ပါသည်။ ထို့ကြောင့် လူများသည် မည်သည့်တစ်ဦးတစ်ယောက်နှင့်မျှ လိင်ဆက်ဆံစရာမလိုပဲ ၎င်းတို့သည် လိင်တူကို သော်လည်းကောင်း လိင်ကွဲကို သော်လည်းကောင်း စွဲလမ်းစိတ်များဖြစ်ပေါ်နိုင်ပြီး မိမိ၏ လိင်စိတ်တိမ်းညွှတ်မှုကို သိနိုင်ပါသည်။ ထို့ကြောင့် မိမိသည် လိင်တူချစ်သူ၊ ဆန့်ကျင်ဘက်လိင်ချစ်သူ သို့မဟုတ် ကျားမနှစ်မျိုးလုံးချစ်သူ ဖြစ်သည်ဆိုသည်ကို လိင်ဆက်ဆံစရာမလိုပဲ သိနိုင်ပါသည်။
အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူ တစ်ဦးချင်းစီသည် ၎င်းတို့၏ လိင်စိတ်တိမ်းညွှတ်မှုနှင့် ပက်သက်၍ အတွေ့အကြုံအမျိုးမျိုး ကွဲပြားကြသည်။ အချို့မှာ သူတို့သည် လိင်တူချစ်သူများဖြစ်ကြောင်း အမှန်တကယ် အခြားသူများနှင့် ဆက်ဆံရေးမရှိခင် အစောကြီးတည်းက သိထားပြီးနှင့်ကြသည်။ အချို့မှာတော့ မိမိ၏ လိင်စိတ်တိမ်းညွှတ်မှုကို နာမည်တပ်မသတ်မှတ်ခင် (လိင်တူနှင့်သော်လည်းကောင်း လိင်ကွဲနှင့်သော်လည်းကောင်း) လိင်မှုကိစ္စ အတွေ့အကြုံ အရင်ရယူပြီးမှသာ အသေအချာ အတည်ပြုသတ်မှတ်ကြသည်။ မလိုမုန်းထားပြုခြင်း နှင့် ခွဲခြားဆက်ဆံခြင်းတို့သည် လူအများအပြားအား ၎င်းတို့ ကိုယ့်ကိုကိုယ် လိင်စိတ်တိမ်းညွှတ်မှု လက်ခံသတ်မှတ်ရာတွင် အခက်အခဲဖြစ်စေသဖြင့် မိမိကိုယ်ကို အမျိုးသမီးချင်းချစ်သူ၊ အမျိုးသားချင်းချစ်သူ သို့မဟုတ် ကျားမနှစ်မျိုးလုံးချစ်သူအဖြစ် သတ်မှတ်မှုသည် နှေးကွေးသည့် ဖြစ်စဉ် ဖြစ်ပါသည်။
လူတစ်ဦးတစ်ယောက်မှ လိင်စိတ်တိမ်းညွှတ်မှုတစ်ခုခု သတ်မှတ်အောင် မည်သည့်အရာများက ပြုလုပ်ပါသလဲ။
သိပ္ပံပညာတွင် လူတစ်ဦးတစ်ယောက်အား မိမိကိုယ်ကို ဆန့်ကျင်ဘက်လိင်ချစ်သူ၊ လိင်တူချစ်သူ သို့မဟုတ် ကျားမနှစ်မျိုးလုံးချစ်သူအဖြစ် သတ်မှတ်သွားစေသည့် တိကျသောအကြောင်းခံအပေါ် အများသဘောတူညီထားခြင်း မရှိပါ။ သုသေသနအတော်အများသည် ဗီဇ၊ ဟော်မှန်း၊ ဇီဝဖွံ့ဖြိုးမှု၊ လူမှုရေး၊ ယဉ်ကျေးမှု နှင့် ပတ်ဝန်းကျင် စသည်တို့မှ ဖြစ်နိုင်သော လိင်စိတ်တိမ်းညွှတ်မှုအပေါ် လွှမ်းမိုးမှုများကို ဆန်းစစ်ခဲ့သော်လည်း လိင်စိတ်တိမ်းညွှတ်မှုသည် အချက်တခုခုက သတ်မှတ်ထားသည်ဟု သိပ္ပံပညာရှင်များမှ ကောက်ချက်ချနိုင်သည့် ရှာဖွေတွေ့ရှိမှု မပေါ်ထွက်လာသေးပါ။ အများအထင်တွင် သဘာဝ နှင့် ပြုစုပျိုးထောင်မှု နှစ်မျိုးစလုံးသည် ရှုပ်ထွေးသောကဏ္ဍမှ ပါဝင်နေပြီး၊ လူအများမှာ လိင်စိတ်တိမ်းညွှတ်မှုကို ရွေးချယ်သည်ဆိုသော အတွေ့အကြုံ နည်းနည်းမှ မရှိကြပါ။
မလိုမုန်းထားပြုခြင်း နှင့် ခွဲခြားဆက်ဆံမှုသည် လိင်တူချစ်သူများ၏ ဘဝတွင် မည်သည့် ကဏ္ဍတွင် ပါဝင်နေသနည်း။
အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူ တို့သည် ၎င်းတို့၏ လိင်စိတ်တိမ်းညွှတ်မှုကြောင့် နိုင်ငံအတော်အများတွင် ကျယ်ပြန့်သော မလိုမုန်းထားပြုခံရမှု၊ ခွဲခြားဆက်ဆံခံရမှု နှင့် အကြမ်းဖက်ခံရမှုတို့ကို ကြုံတွေ့ကြရသည်။
လိင်စိတ်တိမ်းညွှတ်မှုအပေါ် အခြေခံ၍ ခွဲခြားဆက်ဆံခြင်းတွင် ပုံစံအမျိုးမျိုး ရှိသည်။ လူ့အဖွဲ့အစည်းတွင် အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူ တို့အပေါ် နှောင့်ယှက်မှု နှင့် အကြမ်းဖက်မှု နှုန်းများပြားခြင်းသည် လိင်တူချစ်သူများပေါ် မလိုမုန်းထားမှု ပြင်းထန်ခြင်းကို ထင်ဟပ်နေသည်။ အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူ အားလုံးနီးပါးတို့သည် နှုတ်ပိုင်းဆိုင်ရာ နှောင့်ယှက်မှု နှင့် ဆဲရေးတိုင်းထွာမှုတို့ကို ကြုံတွေ့ရသည်။ လိင်တူချစ်သူများအပေါ် လုပ်ငန်းခွင်များတွင် ခွဲခြားဆက်ဆံမှုသည်လည်း ကျယ်ပြန့်နေသေးသည်။
HIV နှင့် AIDS ကူးစက်ရောဂါနှင့် ပက်သက်လာလျှင် လိင်တူချစ်သူများအပေါ် မလိုမုန်းထားပြုခြင်း နှင့် ခွဲခြားဆက်ဆံခြင်းတို့သည် ဆိုးရွားသော သက်ရောက်မှုများ ရှိခဲ့သည်။
ရောဂါ စတင်ပေါ်ပေါက် ပြန့်ပွားစဉ်အခါက HIV/AIDS အား ဂေးရောဂါဟု မှန်းဆသတ်မှတ်မှုသည် AIDS ကြောင့် ဖြစ်ပေါ်လာသော ပြင်ထန်းသည့် လူမှုကသောင်းကနင်းဖြစ်မှုကို ဖြေရှင်းရန် နှေးကွေးစေခဲ့သည်။ ဤရောဂါကြောင့် အမျိုးသားချင်းချစ်သူများ နှင့် ကျားမနှစ်မျိုးလုံးချစ်သူ အများအပြားသည် မဖြစ်သင့်ပဲ မတန်တဆ ဆိုးရွားစွာ ထိခိုက်ခဲ့ရသည်။ HIV/AIDS အား အမျိုးသားချင်းချစ်သူများနှင့်ပက်သက်ခြင်း နှင့် လိင်တူချစ်သူတိုင်း ထိုရောဂါကူးစက်နေသည်ဟု အချို့လူများက မှားယွင်းစွာ ယုံကြည်ထားခြင်း စသည်တို့သည် လိင်တူချစ်သူများကို ပိုဆိုးရွားသော ကဲ့ရဲ့အပြစ်ဆိုမှုများ ဖြစ်စေခဲ့ပါသည်။
မလိုမုန်းထားမှု နှင့် ခွဲခြားဆက်ဆံမှုတို့ကြောင့် မည်ကဲ့သို့ စိတ်ပိုင်းဆိုင်ရာ သက်ရောက်မှုကို ဖြစ်ပေါ်စေနိုင်ပါသလဲ။
မလိုမုန်းထားမှု နှင့် ခွဲခြားဆက်ဆံမှုတို့သည် လူမှုရေး နှင့် တစ်ကိုယ်ရေ သက်ရောက်မှုများ ရှိနိုင်ပါသည်။ လူမှုရေးအဆင့်တွင် လိင်တူချစ်သူများအပေါ် ထားရှိသော မလိုမုန်းထားမှု နှင့် ခွဲခြားဆက်ဆံမှုတို့မှာ လိင်တူချစ်သူအသိုင်းအဝိုင်းမှ သူများအပေါ်တွင်ရှိသော တစ်ဖက်သက် အမြင်များတွင် ထင်ဟပ်နေသည်။ ထိုတစ်ဖက်သပ် ပုံသေစွဲမှုများသည် သက်သေအထောက်အထား မရှိပဲနဲ့ တည်တန့်နေကြပြီး၊ လိင်တူချစ်သူများအပေါ် တရားမမျှတသော ဆက်ဆံမှုများ ပြုလုပ်ရာတွင် ၎င်းတို့ကို အကြောင်းပြချက်အနေနှင့် သုံးသည်။ ဥပမာ အလုပ်အကိုင် အခွင့်အလမ်းများကို ကန့်သတ်ခြင်း၊ မိဘ ဖြစ်ပိုင်ခွင့် မပေးခြင်း နှင့် ၎င်းတို့၏ အချင်းချင်းအကြားမေတ္တာကို အသိအမှတ် မပြုခြင်း စသည်တို့ကို ပြုလုပ်ရာတွင် လိင်တူချစ်သူများအပေါ်ရှိသော တစ်ဖက်သပ် အယူစွဲမှုများဖြင့် အကြောင်းပြကြသည်။
တစ်ကိုယ်ရေ အဆင့်တွင်လည်း ထို မလိုမုန်းထားမှု နှင့် ခွဲခြားဆက်ဆံမှုတို့ကြောင့် အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူများသည် ၎င်းတို့၏ လိင်စိတ်တိမ်းညွှတ်မှုကို ဖုံးကွယ်ပြီး မိမိကိုယ်ကို ငြင်းဆန်ပါက ဆိုးရွားသော အကျိုးဆက်များကို ဖြစ်စေပါသည်။ လိင်တူချစ်သူ အများအပြားသည် လိင်တူချစ်ခြင်းကို လူ့အသိုင်းအဝိုင်းမှ အဆိုးမြင်နေခြင်းကို ရင်ဆိုင်ဖြေရှင်းရန် နည်းလမ်းရှာဖွေနိုင်ကြသော်လည်း ဤကဲ့သို့ မလိုမုန်းထားမှု ဆက်လက်ဖြစ်ပေါ်နေမှုသည် ကျန်းမာရေးနှင့် ခန္ဓသုခအပေါ် ဆိုးရွားသော သက်ရောက်မှုများ ဖြစ်စေနိုင်ပါသည်။ အခြား လက္ခဏာများ ဖြစ်ကြသော လူမျိုး၊ တိုင်းရင်းသား၊ ဘာသာ နှင့် မသန်စွမ်းမှု စသည်တို့အပေါ် အခြေခံ၍ ထိုသက်ရောက်မှုသည် သက်သာနိုင်သလို ပိုဆိုးရွားမှုလည်း ဖြစ်နိုင်ပါသည်။ အချို့ လိင်တူချစ်သူများသည် အဆိုးမြင်ခံရခြင်း နဲလျှင်နဲနိုင်ပေမဲ့ အချို့အတွက်တော့ ၎င်းတို့၏ လူမျိုး၊ တိုင်းရင်းသား၊ ဘာသာ၊ မသန်စွမ်းမှု စသည်တို့ကြောင့် မလိုမုန်းထားမှု နှင့် ခွဲခြားဆက်ဆံမှုတို့၏ သက်ရောက်မှုသည် ပိုမိုများပြားစွာ ဆိုးရွားသွားနိုင်ပါသည်။
လိင်တူချစ်သူများ မကြာခဏပြုခံရလေ့ရှိသည့် မလိုမုန်းထားမှု၊ ခွဲခြားဆက်ဆံမှု နှင့် အကြမ်းဖက်မှု စသည်တို့ ကျယ်ပြန့်နေခြင်းသည် စိတ်ကျန်းမာရေးအတွက် အရေးပါသော စိုးရိမ်စရာများ ဖြစ်ကြသည်။ ၎င်းတို့သည် လိင်တူချစ်သူများအဖို့ အဓိက စိတ်ဖိစီးစရာ အရင်းမြစ်များ ဖြစ်ကြသည်။ လူမှုရေးထောက်ပံ့မှုသည် ထို ဖိစီးမှုများကို ရင်ဆိုင်နိုင်ရန် အရေးပါသော်လည်း လိင်တူချစ်သူများကို ဆန့်ကျင်နေသော သဘောထားများနှင့် ခွဲခြားဆက်ဆံမှုတို့ ရှိနေခြင်းကြောင့် လိင်တူချစ်သူများအနေနှင့် ထိုကဲ့သို့ ထောက်ပံ့မှုကို ရှာဖွေရန် အခက်အခဲကို ဖြစ်စေပါသည်။
လိင်တူချင်းချစ်ခြင်းသည် စိတ်ရောဂါတစ်ခု ဖြစ်ပါသလား။
လိင်တူချင်းချစ်ခြင်းသည် စိတ်ရောဂါတစ်ခု မဟုတ်ပါ။
အမျိုးသမီးချင်းချစ်ခြင်း၊ အမျိုးသားချင်းချစ်ခြင်း နှင့် ကျားမနှစ်မျိုးလုံးချစ်ခြင်း စသည်တို့သည် ရောဂါများ မဟုတ်ပါ။ သုတေသနများသည် လိင်စိတ်တိမ်းညွှတ်မှု မည်သည့် တစ်ခု နှင့် စိတ်ဝေဒနာစွဲကပ်မှုအကြားတွင် ရှိရင်းစွဲ ပက်သက်မှုကို ရှာ၍မတွေ့ပါ။ လိင်တူချင်းစွဲလမ်းမှုကော လိင်ကွဲကိုစွဲလမ်းမှုကပါ လူသားများ၏ လိင်စိတ်လက္ခဏာ၏ သာမှန် အသွင်အပြင်များပင် ဖြစ်သည်။ ၎င်းတို့ နှစ်မျိုးလုံးကို ယဉ်ကျေးမှုအမျိုးအမျိုးနှင့် သမိုင်းခေတ်ကာလ အဆက်ဆက်တို့တွင် မှတ်တမ်းတင်ထားသည်ကို တွေ့နိုင်သည်။ အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူတို့အား စိတ်မှားယွင်းသူဟု ဖော်ပြနေသော အမြင်မှားများ ရှိနေသော်လည်း၊ ဆယ်စုနှစ်ပေါင်းများစွာ စုပေါင်းလာသော သုသေသနများ နှင့် ဆေးကုသမှုနယ်ပယ်မှ အတွေ့အကြုံများသည် ဆေးပညာ နှင့် စိတ်ကျန်းမာရေးအဖွဲ့အစည်းများ အားလုံးကို မှတ်ချက်ချစေသည်မှာ မည်သည့် လိင်စိတ်တိမ်းညွှတ်မှုမဆို လူ့အတွေ့အကြုံ၏ သာမာန်သွင်ပြင်သာ ဖြစ်သည်ဟူ၍ပင်ဖြစ်သည်။ အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူတို့၏ ဆက်ဆံရေးများမှာ လူသားများအနှောင်ဖွဲ့မှု၏ သာမှန်သွင်ပြင်သာ ဖြစ်သည်။ ထို့ကြောင့် အဖွဲ့အစည်းများကြီးသည် လိင်တူချစ်ခြင်းအား စိတ်ရောဂါတစ်ခုအဖြစ် သတ်မှတ်ခြင်းမှု စွန့်လွတ်ခဲ့သည်မှာ ကြာလှပြီ ဖြစ်သည်။
ဖွင့်ပြောခြင်း (အင်္ဂလိပ်လို coming out) ဆိုသည်မှာ ဘာပါလဲ။ အရေးကြီးပါသလား။
ဖွင့်ပြောခြင်း (coming out) ဆိုသော စကားလုံးမှာ အမျိုးသမီးချင်းချစ်သူ၊ အမျိုးသားချင်းချစ်သူ နှင့် ကျားမနှစ်မျိုးလုံးချစ်သူများ၏ ဘဝအတွေ့အကြုံများရှိ အခန်းကဏ္ဍအမျိုးမျိုးနှင့် ဆက်စပ်နေပါသည်။ ၎င်းတို့ထဲတွင် လိင်တူအပေါ်တွင် စွဲမက်နေသည်ကို မိမိကိုယ်ကို သတိပြုသိရှိပြီး အသိအမှတ်ပြုခြင်း၊ အခြားတစ်ဦးတစ်ယောက် (သို့မဟုတ်) အချို့ကို ထိုစွဲမက်မှုများကို ဖွင့်ပြောပြခြင်း၊ မိမိပတ်ဝန်းကျင်ရှိ လူအများကို ပွင့်လင်းစွာဝန်ခံခြင်း နှင့် လိင်တူချစ်သူအသိုင်းအဝိုင်းတွင် မိမိဆန့်ဝင်သည်ဟု မိမိကိုယ်ကို သတ်မှတ်ခြင်း စသည့်အဆင့်အမျိုးမျိုး ပါဝင်ပါသည်။ လူအများသည် မလိုမုန်းထားမှု နှင့် ခွဲခြားဆက်ဆံမှုတို့အား ကြုံတွေ့ရမည့် အန္တရာယ်များကို ကြောက်ရွံ့သောကြောင့် ဖွင့်ပြောရန် စိုးရွံ့တတ်ပါသည်။ အချို့သည် ၎င်းတို့၏ မိမိကိုယ်ကိုသတ်မှတ်ပုံကို လျှို့ဝှက်ထားကာ၊ အချို့မှာ အခြေအနေအမျိုးမျိုးအပေါ် မူတည်၍ ဖွင့်ပြောတတ်ကြပြီး၊ အချို့ကတော့ ပတ်ဝန်းကျင်ကို ပွင့်ပွင့်လင်းလင်း ပြောပြရန် ဆုံးဖြတ်ကြသည်။
ပုန်းကွယ်နေရာမှ ဖွင့်ပြောခြင်းသည် လိင်တူချစ်သူများအတွက် အရေးပါသော စိတ်ပိုင်းဆိုင်ရာ ခြေလှမ်းတစ်ခု ဖြစ်သည်။ လူတစ်ဦးသည် မိမိ၏ လိင်စိတ်တိမ်းညွှတ်မှုကို အပြုသဘောဆောင်သော ခံစားချက်ဖြင့်မြင်ပြီး ၎င်းကို မိမိဘဝအတွင်း အစိတ်အပိုင်းတစ်ခုအဖြစ် လက်ခံထည့်သွင်းခြင်းသည် ထိုသူ၏ စိတ်ကျန်းမာရေးနှင့် ကျန်းမာသုခကို အများကြီး အထောက်အကူဖြစ်စေပါသည်ဟု သုတေသနများက ပြပါသည်။ လက်ခံထည့်သွင်းခြင်းဆိုသည်မှာ မိမိ မည်သူမည်ဝါဖြစ်ကြောင်းကို သူများအပေါ်ဖုံးကွယ်မထားခြင်းပါဝင်နိုင်သလို မိမိကဲ့သို့သော အခြားလိင်တူချစ်သူများ၏ အသိုင်းအဝိုင်းတွင် ပါဝင်ဆင်နွဲခြင်းလည်း ဖြစ်နိုင်သည်။ မိမိ၏ လိင်စိတ်တိမ်းညွှတ်မှုကို အခြားသူများနှင့် ဆွေးနွေးနိုင်ခြင်းသည် လူမှုထောက်ပံ့မှု ရနိုင်မှုကို တိုးမြင့်ပြီး ထိုထောက်ပံ့မှုသည် စိတ်ကျန်းမာရေးနှင့် စိတ်ပိုင်းဆိုင်ရာသုခအတွက် အလွန်အရေးပါသည်။ ဆန့်ကျင်ဘက်လိင်ချစ်သူများ
ကဲ့သို့ပင် လိင်တူချစ်သူများသည်လည်း မိသားစု၊ သူငယ်ချင်းမိတ်ဆွေ နှင့် သိကျွမ်းသူများနှင့် မိမိ၏ ဘဝကိုဝေမျှပြီး ၎င်းတို့ဆီမှ အထောက်အပံ့ ရနိုင်ခြင်းမှ အကျိုးကျေးဇူးများ ရရှိနိုင်ပါသည်။ ထိုကြောင့် မိမိ၏ လိင်စိတ်တိမ်းညွှတ်မှုကို ဖုံးကွယ်ထားရမည်ဟု ခံစားရသော လိင်တူချစ်သူများသည် ပိုမိုပွင့်လင်းသော လိင်တူချစ်သူများထက် စိတ်ပိုင်းဆိုင်ရာ စိုးရိမ်မှုများကို ပိုမိုကြုံတွေ့ရသည်မှာ မဆန်းပါ။
လိင်တူနှစ်ဦးအကြား၏ မေတ္တာရေးမှာ မည်သို့သော သဘောသဘာဝ ရှိပါသလဲ။
သုတေသနများမှ ဖော်ညွန်းသည်မှာ အမျိုးသမီးချင်းချစ်သူ နှင့် အမျိုးသားချင်းချစ်သူများသည် တစ်ဦးကိုတစ်ဦး သစ္စာရှိစွာလက်တွဲပေါင်းသင်းလိုစိတ်ရှိပြီး တကယ်ပင်ပေါင်းသင်းကြပါသည်။
သုသေသနများက မှားယွင်းကြောင်း ဖော်ပြထားသော်လည်း လိင်တူချစ်သူများနှင့် ပက်သက်သော အမြင်မှားမှုများသည် ဆက်လက်တည်ရှိနေသေးသည်။ ဥပမာ အမြင်မှားတစ်ခုမှာ လူအများသည် အမျိုးသမီးချင်းချစ်သူ နှင့် အမျိုးသားချင်းချစ်သူများ၏ မေတ္တာရေးသည် လက်တွေ့မကျပဲ မပျော်ရွှင်ဟု သတ်မှတ်ကျသည်။ သို့သော် လေ့လာမှုများသည် လိင်တူချစ်သူများ နှင့် ဆန့်ကျင်ဘက်လိင်ချစ်သူ စုံတွဲများသည် မေတ္တာရေးတွင် ကျေနပ်မှုရှိမှု နှင့် တစ်ဦးကိုတစ်ဦး သစ္စာရှိမှုတို့ကို တိုင်းတာရာတွင် တူညီကြောင်း ပြသသည်။
ဒုတိယ အမြင်မှားတစ်ခုမှာ လိင်တူချစ်သူများ၏ မေတ္တာရေးသည် မတည်မြဲဟူ၍ ဖြစ်သည်။ သို့သော် လူ့အသိုင်းအဝိုင်းမှ လိင်တူချစ်ခြင်းကို မုန်းတီးမှုပြသသော်လည်း သုတေသနမှ ပြသသည်မှာ လိင်တူချစ်သူများသည် ကြံ့ကြံ့ခံသော ဆက်ဆံရေးမျိုးရှိသည်ဟူ၍ ဖြစ်သည်။ နောက်တစ်ချက်မှာ လိင်တူချစ်သူစုံတွဲများသည် ဆန့်ကျင်ဘက်လိင်ချစ်သူစုံတွဲများကဲ့သို့ တူညီသော အထောက်အပံနှင့် အသိအမှတ်ပြမှုကိုရရှိပါက လူနှစ်ဦးမေတ္တာရေးဘဝ၏ တည်ငြိမ်မှုသည် ပိုမိုအားကောင်းလာမည်ဆိုသည်မှာ အကြောင်းအကျိုးသင့်ပါသည်။ အထောက်အပံ့ ဥပမာများမှာ လက်ထပ်ထိမ်းမြားမှုနှင့်ပက်သက်သော တာဝန်ဝတ္တရားများနှင့် တရားဥပဒေအရ ရသင့်ရပိုင်ခွင့်များ စသည်တို့ ဖြစ်ကြသည်။
တတိယ အမြင်မှားတစ်ခုမှာ အမျိုးသမီးချင်းချစ်သူ နှင့် အမျိုးသားချင်းချစ်သူ စုံတွဲများ၏ ရည်မှန်းချက် နှင့် တန်ဖိုးထားသောအရာများမှာ ဆန့်ကျင်ဘက်လိင်ချစ်သူစုံတွဲတို့၏ အရာများနှင့် ကွဲပြားသည်ဟူ၍ ဖြစ်သည်။ အမှန်တွင် သုတေသနများမှ ပြသသည်မှာ မေတ္တာရေး၏ ကျေနပ်မှု၊ သစ္စာရှိမှု နှင့် တည်ငြိမ်မှုတို့ကို လွှမ်းမိုးသော အချက်များမှာ အတူနေကြသော လိင်တူချစ်သူစုံတွဲများကော ဆန့်ကျင်ဘက်လိင်ချစ်သူ အိမ်ထောင်ရှင် စုံတွဲများ အတွက်ပါ အတူတူပင် ဖြစ်ကြသည်။
အမျိုးသမီးချင်းချစ်သူ၊ အမျိုးသားချင်းချစ်သူများ နှင့် ကျားမနှစ်မျိုးလုံးချစ်သူတို့ အပေါ် ခွဲခြားဆက်ဆံမှု နှင့် မလိုမုန်းထားမှုတို့ကို လျှော့ချပယ်ပြောက်အောင် လူအများ မည်သို့လုပ်နိုင်မည်နည်း။
မလိုမုန်းထားမှု နှင့် ခွဲခြားဆက်ဆံမှုကို လျှော့ချလိုသော လိင်တူချစ်သူများသည် မိမိတို့၏ လိင်စိတ်တိမ်းညွှတ်မှုကို မိမိကိုယ်ကို ယုံကြည်စွာလက်ခံထားပြီး လိင်တူချစ်သူများကို ဆန့်ကျင်သည့် အယူမှားများ ရှိနေသည့် ပတ်ဝန်းကျင်တွင် မိမိ၏ ယုံကြည်မှုစနစ်ကို ပြန်လည်ဆန်းစစ်နိုင်စွမ်း ရှိရမည်။
လိင်တူချစ်သူများသည် ကိုယ့်အသိုင်းအဝိုင်းရှိ အခြားလိင်တူချစ်သူများဆီမှ အထောက်အပံ့များ ရရှိနိုင်သလို ကိုယ့်ဘက်မှ ရပ်တည်ပေးသော ဆန့်ကျင်ဘက်လိင်ချစ်သူများဆီမှလည်း အထောက်အပံ့ ရယူနိုင်ပါသည်။ လိင်တူချစ်သူများအပေါ်ရှိနေသော မလိုမုန်းထားမှု နှင့် ခွဲခြားဆက်ဆံမှုကို လျှော့ချလိုသော ဆန့်ကျင်ဘက်လိင်ချစ်သူများအနေနှင့်လည်း လိင်တူချစ်သူများကို ဆန့်ကျင်သည့် မလိုမုန်းထားမှုနှင့် အယူလွဲအမြင်မှားများအပေါ် မိမိတို့၏ တုံ့ပြန်မှုကို ပြန်လည်ဆန်းစစ်ရမည်။ ဆန့်ကျင်ဘက် လိင်ချစ်သူများသည် ၎င်းတို့မှ လိင်တူချစ်သူများအပေါ် နားလည်သဘောပေါက်လာပုံကို အခြားသူများကို ပြန်ရှင်းပြနိုင်သလို လိင်တူချစ်သူများနှင့်အတူတကွ မလိုမုန်းထားမှု နှင့် ခွဲခြားဆက်ဆံမှုကို တိုက်ဖျက်ရာတွင် အတူတကွ ဆောင်ရွက်ရမည်။ လိင်တူချစ်သူများနှင့် ယှဉ်လျှင် ဆန့်ကျင်ဘက်လိင်ချစ်သူများသည် အခြားဆန့်ကျင်ဘက်လိင်ချစ်သူများ၏ အပြုအမူနှင့် ယုံကြည်မှုတို့ရှိ မလိုမုန်းထားမှု သို့မဟုတ် ခွဲခြားဆက်ဆံမှုတို့ ဖြစ်နေစေသော သဘောသဘာဝများကို ပြန်လည် ဆင်ချင်တွေးတောရန် ပြောဆိုဖို့ ပိုမို အားသာသော အနေအထားတွင်ရှိသည်။ ဆန့်ကျင်ဘက်လိင်ချစ်သူ မဟာမိတ်များသည် မိမိတို့၏ ပတ်ဝန်းကျင်တွင် လိင်စိတ်တိမ်းညွှတ်မှု အမျိုးအစားအားလုံးကို အားလုံးပါဝင်စေမည့် ခွဲခြားဆက်ဆံမှုမရှိသော မူဝါဒများ ပြုလုပ်နိုင်အောင် အားပေးနိုင်သည်။ ၎င်းတို့သည် လိင်တူချစ်သူများက ဖွင့်ပြောလာလျှင် လုံခြုံမှုပေးနိုင်အောင် ပြုလုပ်နိုင်သည်။ အမျိုးသမီးချင်းချစ်သူ၊ အမျိုးသားချင်းချစ်သူများနှင့် ကျားမနှစ်မျိုးလုံး ချစ်သူများသည် ၎င်းတို့၏ လိင်စိတ်တိမ်းညွှတ်မှုကို အများကိုပြောပြနိုင်သော ခံစားမှုမျိုး ရရှိလာသောအခါတွင် ဆန့်ကျင်ဘက်လိင်ချစ်သူများအနေနှင့် ၎င်းတို့ကို သာမာန်လူသားများအဖြစ် မြင်နိုင်ပြီး ပိုမိုရင်းနှီးစွာ ဆက်ဆံတွေ့ကြုံနိုင်ကာ နားလည်မှု ပိုမိုကောင်း မွန်လာနိုင်မည်ဖြစ်သည်။
မလိုမုန်းထားမှုနှင့် ပက်သက်သော လေ့လာချက်များအရ လူများစုအုပ်စုထဲမှ လူများသည် လူနည်းစုအုပ်စုထဲမှ လူများနှင့် ဆက်ဆံတွေ့ကြုံမှုများ ပြုလုပ်ပါက မလိုမုန်းထားမှုသည် ကျဆင်းသွားကြောင်း ပြသသည်။ ထို့ကြောင့် ဆန့်ကျင်ဘက်လိင်ချစ်သူများမှ လိင်တူချစ်သူများကို လက်ခံလာမှုကို အကြီးမားဆုံးလွှမ်းမိုးနိုင်သည့် အချက်မှာ လိင်တူချစ်သူများနှင့် ရင်းနှီးစွာ တွေ့ကြုံဆက်ဆံခြင်းပင် ဖြစ်သည်။ မိသားစုအသိုင်းအဝိုင်းအတွင်း သို့မဟုတ် မိတ်ဆွေသူငယ်ချင်း အသိုင်းအဝိုင်းအကြားတွင် ဆန့်ကျင်ဘက်လိင်ချစ်သူများကို ပွင့်လင်းစွာ ဖွင့်ပြောထားသော လိင်တူချစ်သူများရှိသော အသိုင်းအဝိုင်းတွင် လိင်တူချစ်သူများကိုဆန့်ကျင်သော သဘောထားများ လွန်စွာ နည်းပါးလေ့ရှိသည်။
ဤ ပြဠာန်းချက်ကို အီလက်ထရောနစ် စာဆောင်အဖြစ် ရယူလိုပါက ဤနေရာတွင် PDF ကို ရယူနိုင်ပါသည်။ ဤစာဆောင်ကို မည်သူ့ကိုမဆိုဝေမျှနိုင်ပါသည်။ ပုံနှိပ်ပြီး မိမိ ပတ်ဝန်းကျင်အသိုင်းအဝိုင်းကို နားလည်မှု ပိုမိုကောင်းမွန်ပြုလုပ်လို၍ ပြသလိုပါကလည်း ဖြန့်ဝေနိုင်ပါသည်။
