လုလင်: ချိန်းတွေ့

Showing posts with label ချိန်းတွေ့. Show all posts

0 comments Labels: Relationship, ချိန်းတွေ့, မေတ္တာရေး

ပထမဆုံးချိန်းတွေ့တဲ့အချိန်မှာ အနာဂတ်ချစ်သူကို ဘယ်လိုပိုးပန်းမလဲ

အခုခေတ်မှာ အင်တာနက်မှာ အနာဂတ်ချစ်သူကို ရှာလို့လွယ်ကူတာကြောင့် ချစ်သူရည်းစားတွေ အင်တာနက် နဲ့ ဖုန်းတွေကတဆင့် ဖူးစာဆုံသွားကြသူတွေ မနည်းပါဘူး။ အဲ့တော့ grindr တို့ Facebook တို့ ကလိုနေရာတွေကနေ ကိုယ့်အတွက် အလားအလာရှိတဲ့ သူတစ်ယောက်ကို စကားပြောနေပြီး တစ်ဦးနဲ့တစ်ဦးလည်း သဘောကျပြီး အဆင်ပြေနေပြီဆိုရင် အပြင်မှာ စတွေ့ကြဖို့ ပြောဆိုကြပါတော့မယ်။ အကယ်၍ ကိုယ်က သူ့ကို တစ်ညတာတွေ့ဖို့သက်သက်သာ မဟုတ်ပဲ အမှန်တကယ်ရေရှည်လက်တွဲဖို့ စဉ်းစားကြတယ်ဆိုရင် စတွေ့တဲ့အချိန်ကနေစပြီး အဆုံးထိ တည်တံ့သွားနိုင်အောင် ပထမစချိန်းတွေ့တဲ့နေ့မှာ ဂရုပြုရပါမယ်။ ဒါမှသာ သူကနောက်တစ်ကြိမ်ပြီးတစ်ကြိမ် ထပ်ခါထပ်ခါ တွေ့ချင်ကြမှာပေါ့။

အဲ့တော့ စတွေ့တော့မယ်ဆိုရင် ပထမ မတွေ့ခင် ဘာတွေပြင်ဆင်ရမလဲဆိုတဲ့အချက်တွေကို စိတ်ထဲမှာထားရမယ်။ ပြီးရင် တွေ့တဲ့အခါ ဘာအကြောင်းအပြောရမလဲပေါ့။

ပြီးတော့ တွေ့တဲ့အခါ ရှောင်ရမယ့်အချက်တွေကိုလည်း သိထားဖို့လိုမယ်။ ပြီးတော့ ဘယ်သူမှ ပြောနိုင်တာမဟုတ်ဘူးလေ ကိုယ့်လုံခြုံရေးကိုလည်း စဥ်းစားဖို့လိုမယ်။ အဲ့ဒါတွေပြီးသွားပြီဆိုရင်မှ ချစ်သူဖြစ်လာမယ့်သူကို ဘယ်လိုပိုးပမ်းရမလဲပေါ့။ လူတစ်ဦးနဲ့တစ်ဦး မတူကြတာကြောင့် ပုံသေပြောလို့မရတာ အသေအချာဆိုပေမယ့် အောက်ကအချက်လေးတွေက အားလုံးနဲ့ အကျုံးဝင်ပါတယ်။

၁) ချိန်းတွေ့ခါနီး မတိုင်ခင်အချိန်ကို အလေးထားပါ။
ဆိုလိုချင်တာက ကိုယ် သူနဲ့ ချိန်းတွေ့ဖို့ကတိပေးပြီးပြီဆိုရင် ပထမဆုံးချိန်တွေ့မယ့်နေ့ကို အလေးထားပါ။ မတွေ့ခင် တွေ့ခါနီး အဆက်အသွယ်မပျက်ပါစေနဲ့။ ရောက်မယ့်အချိန်၊ လာနေကြောင်းစသဖြင့် ပြောခြင်းဖြင့် သင်ဟာ သူ့ကို အလေးထားကြောင်းပြပါတယ်။ တချိန်လုံးလည်း အများကြီး ပြောစရာမလိုပါဘူး။ လိုသလောက်ပြောခြင်းဖြင့် သူနဲ့ အဆက်သွယ်ဖို့ အလေးထားတယ်ဆိုတာကို ပြပါတယ်။ နောက်ပြီး နောက်ကျလျှင် မည်မျှနောက်ကျမယ် စသဖြင့် အချိန်ကိုအတိအကျ ပြောခြင်းအားဖြင့်လည်း သူ့ကို လေးစားကြောင်းပြပါတယ်။

တွေ့ဖို့ကတိပေးပြီးရင် မဖျက်ပါနှင့် ဒါမှသို့မဟုတ် မပြောင်းလဲပါနဲ့။ ဘာလို့လဲဆိုတော့ အစီအစဥ်ကို တခြားကိစ္စတစ်ခုခုကြောင့် ဖျက်ဖြစ်တယ်ဆိုတာဟာ သူ့ကို တခြားကိစ္စတွေလောက် အစကတည်းက အလေးမထားဘူးဆိုတာကို ပြတာမျိုးလဲဖြစ်ပါတယ်။ ဒါကြောင့် ကတိတည်ဖို့လည်း အရေးကြီးပါတယ်။

၂) နေ့လည်ပိုင်းချိန်းမလား ညနေပိုင်းချိန်းမလား။
နှစ်ယောက်လုံးအားလပ်ရက်ဆိုရင် နေ့လည်စာအတူတူစားဖို့ စတွေ့ကြပြီးတော့ တနေ့တာအတူတူလျှောက်လည်ဖို့ အချိန်ရတာမို့ တစ်ယောက်နဲ့တစ်ယောက်ကောင်းကောင်း သိကျွမ်းဖို့ အခွင့်အရေးရပါတယ်။ ဒါမှမဟုတ်ပဲ ညနေဘက်ချိန်းပြီး ညစာအတူတူစားတာမျိုးကျတော့ ပိုပြီး တရင်းတနှီးပုံစံမျိုးနဲ့ဖြစ်ပြီး တွေ့တဲ့နေ့မှာပဲ တညတာ အတူတူကုန်ဆုံးဖို့ အစီအစဉ်ရှိတဲ့ သဘောမျိုးလည်း ကျရောက်ပါတယ်။ ဒီအချက်တွေက အားလုံးအတွက် ဒီလိုပုံစံမျိုးလာမယ်လို့ ပုံသေ သတ်မှတ်လို့မရပေမယ့် အချင်းချင်း ဘာလုပ်ချင်တယ်ဆိုတာကို အစကတည်းက အချက်ပြထားတော့ ချိန်းတွေ့တဲ့ နေ့က ပိုပျော်ဖို့အကောင်းတာပေ့ါ။

၃) သပ်သပ်ရပ်ရပ် ဝတ်ဆင်သွားပါ။
ချိန်းတွေ့တဲ့အခါတိုင်း အကောင်းစားအင်္ကျီတွေ၊ ဖိနပ်တွေ၊ မျက်မှန်တွေနဲ့ အထင်ကြီးအောင် ဝတ်ဆင်သွားဖို့ ကို ဆိုလိုတာမဟုတ်ပါဘူး။ အနာဂတ်မှာ ချစ်သူဖြစ်လာမည့်သူနဲ့တွေ့ဖို့ အလေးထားပြီး သေသေချာချာ ပြင်ဆင်လာတာကို သပ်ရပ်သန့်ရှင်းတဲ့ အဝတ်အစားနဲ့ သေချာဖီးလိမ်းလာတယ်ဆိုတာနဲ့ ပြသခြင်း ဖြစ်ပါတယ်။

၄) အာရုံစိုက်ပေးပါ။
ချစ်သူလေးနဲ့ တွေ့နေတဲ့အခါ တွေ့နေတဲ့အချိန်ကို အလေးထားကြောင်း အာရုံစိုက်ကြောင်းပြဖို့ အရေးကြီးပါတယ်။ ပြန်ချင်သလိုလို၊ အလုပ်များနေသလို၊ တခြားသူတွေနဲ့ တခြားကိစ္စတွေရှိသလို၊ သူငယ်ချင်းတွေနဲ့ လုပ်စရာရှိနေသလိုလို၊ မိသားစုပြသနာ ရှင်းချင်သလို စသဖြင့် သူနဲ့တွေ့နေတဲ့ အချိန်ထဲ စိတ်မရောက်ပဲနေတာက အတော်ကို စိတ်ပျက်ဖို့ ကောင်းပါတယ်။ အဲ့လိုမလုပ်ပဲ သူပြောတာကို တလေးတစားနားထောင်ပေးတာက ယုံကြည်မှုရစေပြီး နောက်ပိုင်းလာမည့် အချိန်တွေကို ဆက်လက်လျှောက်လှမ်းလိုစိတ်ကို ဖြစ်ပေါ်စေပါတယ်။

၅) ပွင့်လင်းပါ။
အနာဂတ်ချစ်သူကို ကိုယ်တကယ်မဟုတ်တဲ့ အကြောင်းတွေနဲ့ အထင်အမြင်မှားအောင် လျှောက်ပြောမယ့်အစား ကိုယ့်တကယ့်အကြောင်းကို ပွင့်ပွင့်လင်းပြောပါက ကောင်းပါမယ်။ ကိုယ့်မှာရှိသမျှ ပြသနာတွေကို ကြောက်သွားအောင် ချပြခိုင်းတာ မဟုတ်ဘူးနော်။ အထင်ကြီးအောင် လိမ်ညာပြောတာတွေက နောက်ပိုင်းမှာတကယ်မဟုတ်လို့ စိတ်ပျက်ကုန်တာတွေ ဖြစ်စေပါတယ်။

၆) သူစိတ်ဝင်စားတဲ့ အကြောင်းတွေကို မေးပါ နားထောင်ပေးပါ။
ကိုယ့်အကြောင်းကြီးပဲ ထိုင်ပြောမနေပါနဲ့။ သူ့ကို ပြောဆိုလာနိုင်အောင် လမ်းခင်းပေးပါ။ ချစ်သူက ကိုယ်စိတ်ဝင်စားတဲ့အကြောင်းကို စိတ်ဝင်တစားနားထောင်နေတာလောက် ပျော်ဖို့ကောင်းတာ မရှိပါဘူး။

၇) သူ့ကို သိမ့်သိမ့်မွေ့မွေ့ ချီးကျူးပေးပါ။
နေရခက်အောင် သိသိသာသာကြီး မြောက်ပင့်ပြောတာထက် သူ့ရဲ့ထူးခြားတဲ့ အချက်တွေကို ချီးကျူးတာက စိတ်ရင်းအမှန်ကို ပြပါတယ်။ ပြီးတော့ ကိုယ့်ဘက်က ဘယ်လိုကြိုက်ကြောင်း တဖက်သက်ကြီးပြောမယ့်အစား သူ့ကို ဗဟိုပြုပါ။ ဥပမာ မင်းမျက်လုံးတွေကို ကိုယ်အရမ်းကြိုက်နေပြီလို့ ပြောမယ့်အစား မင်းမျက်လုံးတွေက လှပါတယ်လို့ပြောတာက ပိုပြီးကောင်းပါမယ်။ နောက်ပြီး နှစ်ဦးနှစ်ဖက်စလုံးက မြင်မြင်ချင်းချစ်မိတဲ့အဖြစ်မျိုး မဟုတ်လျှင် ကိုယ်က ဘယ်လောက်ကြိုက်နေကြောင်း ဇွတ်မပြောပါနဲ့။ လန့်သွားစေနိုင်ပါတယ်။ သူ့ကို တဖြည်းဖြည်းအချိန်ပေးပြီး သူတုန့်ပြန်ပုံကို အခြေခံပြီး လိုသလောက်သာပြောသင့်ပါတယ်။

လူတစ်ဦးနဲ့ တစ်ဦးမတူတာမို့ ဒီအချက်တွေကို တသွေမသိမ်းလိုက်နာရမယ်လို့ မဆိုပေမယ့် ဒီအချက်လေးတွေက မသိမသာလေး သူ့စိတ်ကို စွဲဆောင်နိုင်မှာပါ။ ကိုယ့်ဘက်က ဆောင်ရန်ရှောင်ရန် အချက်လေးတွေနဲ့ ပြင်ဆင်လာတော့ ပုံမှန်ဖြစ်မယ့် ချိန်းတွေ့မှုလေးက ပိုပျော်စရာကောင်းတဲ့ ချိန်းတွေချိန်လေးဖြစ်သွားတာပေါ့။ ဘာပဲပြောပြော ကိုယ့်နဲ့ အနာဂတ်လက်တွဲဖော်ဖြစ်လာမယ့် ချစ်သူလေးနဲ့ ပထမဆုံး ချိန်းတွေ့တဲ့နေ့ကို ပျော်ပျော်ရွင်ရွင်နဲ့ ဖြတ်သန်းနိုင်ကြပါစေ။

0 comments Labels: Life, Relationship, ချိန်းတွေ့, ဘဝ, လုံခြုံရေး

အင်တာနက် ဖူးစာရှာဖွေခြင်းနှင့် ဘေးကင်းလုံခြုံရေး

Written by Min Thuta
မင်းသုတ ရေးသားသည်။

ကျွန်တော်တို့ လိင်တူချစ်သူတွေ အနေနှင့် အခြား လိင်တူတစ်ယောက်ဟာ ကိုယ့်လိုပဲ လိင်တူချစ်သူတစ်ယောက်လား ဆိုတာကို အမြင်နှင့် မှန်အောင် မှန်းဆဖို့ဆိုတာ ခဲယဉ်းပါတယ်။ လိင်ကွဲချစ်သူလို ဆန့်ကျင်ဘက်လိင်ကို စိတ်ဝင်စားရင် ရည်စားစကား သွားပြောဖို့လောက် မမြန်နိုင်ပါဘူး။ အဲ့ဒီလို မသေချာတဲ့ အထဲမှာ စိတ်ဝင်စားသူ လိင်တူတစ်ယောက်ကို ကိုယ့်အနေနှင့် စကားသွားပြောဖို့ အခွင့်အလမ်း အမြဲမရှိနိုင်တာကြောင့် ကျွန်ုပ်တို့ အများစုမှာ ချစ်သူရည်းစားရဖို့ အတော်ကျိုးပမ်းရ၊ စောင့်ရပါတယ်။ လိင်တူချစ်သူတွေ စုဆည်းတဲ့နေရာမျိုးကို သွားမှသာ သေချာပါတယ်။ ဒါမျိုးက လိင်တူချစ်သူတိုင်းအတွက် မလွယ်လှပါဘူး။

ဒါပေမဲ့ အင်တာနက် နည်းပညာကြောင့် ကျွန်တော်တို့ရဲ့ ဘဝတွေက ဖူးစာရှာဖို့ ပိုလွယ်လာပြီလို့ ပြောလို့ရပါတယ်။ လိင်တူချစ်သူတွေသာ အသုံးအပြုတဲ့ website တွေ နှင့် ဖုန်း application တွေ အများကြီး ပေါ်နေပြီမို့ အသုံးများလာတာကို တွေ့ရပါတယ်။ အင်တာနက်ပေါ်မှာ Facebook ပဲဖြစ်ဖြစ်၊ dating websiteမှာ ပဲဖြစ်ဖြစ်၊ ဖုန်းပေါ်က ဖူးစာရှာ/အပျော်ရှာတဲ့ app ပဲ ဖြစ်ဖြစ် ကိုယ့်ကိုယ့်ကို လူမသိအောင် သိုသိုဝှက်ဝှက် account တစ်ခုဖွင့်ပြီး ချစ်သူ/အဖော်ရှာဖွေ နိုင်ပါတယ်။ အထူးသဖြင့် လိင်တူချစ်သူတွေမှန်း လူမသိစေလိုတဲ့ သူတွေများစုဟာ ကိုယ့်ရဲ့ ရုပ် နဲ့ နာမည်ရင်းကို ဝှက်ထားလေ့ရှိကြပါတယ်။ အဲ့ဒီအခါမှာ ကိုယ်က onlineမှာ စကားပြောနေတဲ့ သူက ဘယ်သူလဲဆိုတာ တော်တော်နဲ့ မသိနိုင်ပါဘူး။ လူချင်းမတွေ့တော့ ပြောချင်ရာ ပြောရင်လည်း လိမ်ပြောမှန်း ခွဲခြားဖို့ မဖြစ်နိုင်ပါဘူး။ အထူးသဖြင့် ကိုယ် online မှာ ပြောနေတဲ့သူက လူကောင်းလား မသမာသူလားဆိုတာ ဘယ်လိုမှ မတွေ့မချင်း ပြောလို့မရပါဘူး။ အဓိက ကတော့ အားလုံးဟာ လူကောင်းနဲ့ ရေစက်ပါပြီး ဖူးစာဆုံဖို့ ဆိုတာ ဖြစ်ပေမဲ့၊ ကိုယ့်အတွက် မသေချာတဲ့ အခါ အမြဲ သတိထားတာ ကောင်းပါတယ်။ သူက ကိုယ့်ကို မသမာမှု ပြုချင်လို့ ချိန်းတွေ့ရအောင် ဖိတ်ခေါ်ရင် ခက်ပြီ။

အဲ့တော့ကိုယ် online မှာ အဆင်အပြေနေပြီး တစ်ခါမှ မမြင်ဖူးတဲ့ လူစိမ်းတစ်ယောက်နဲ့ နောက်ဆုံး အပြင်မှာ ချိန်းတွေ့တော့မယ်ဆိုရင် ကိုယ့်လုံခြုံရေးကိုလည်း အရေးတယူ စဉ်းစားသင့်ပါတယ်။ အဲ့တော့ နောက်တစ်ခါ တစိမ်းတစ်ယောက်ကို အင်တာနက်မှာ တွေ့ပြီးနောက် အပြင်မှာ ချိန်းတွေ့ဖို့ ဆိုကာရင် အောက်ကရိုးရှင်းတဲ့ အချက်လေးတွေကို လိုက်နာပြီး ကိုယ့်ကိုယ်ကို သတိ ဂရုပြုလို့ရပါတယ်။

- အများပြည်သူရှိတဲ့နေရများကို တွေ့ဖို့ရွေးချယ်ပါ။ ဥပမာ လူများတဲ့ လက်ဖက်ရည်ဆိုင်တို့၊ စားသောက်ဆိုင်တို့၊ ပန်းခြံတို့လိုမျိုးပါ။ လူပြတ်တဲ့နေရာတွေကို ဖိတ်ခေါ်တဲ့အခါ လက်မခံပါနှင့်။ ထိုသူက လူကောင်းဆိုတာ လုံးဝ အပြည့်အဝ မယုံကြည်ရဘူးဆိုရင် သူ့အိမ်၊ကိုယ့်အိမ် သွားဖို့ မစီစဉ်တာ အကောင်းဆုံးပါ။ အပြင်မှာသာ အရင်တွေ့ပါ။
- အိမ်လိပ်စာ အတိအကျ မပေးပါနဲ့။ ကိုယ့်ရဲ့ တစ်ကိုယ်ရည် အသေးစိတ်အချက်အလက်တွေ တစ်ခုမှ မပေးပါနဲ့။ အလုပ်နေရာ၊ ကျောင်းနေရာတွေလည်း မလိုအပ်ရင် မပြောပါနဲ့။ ငွေရေးကြေးရေး ကိစ္စတွေနဲ့ ဘဏ်ကိစ္စတွေ ဘာမှဆွေးဖို့ မလိုဘူးဆိုတာ ရှင်းရှင်းလေးပါ။
- ဖြစ်နိုင်မယ်ဆိုရင် သင်သွားတွေ့မယ်ဆိုတာ အချိန်နှင့် နေရာကို ရင်းနှီးသူတစ်ဦးကို ပြောထားပါ။ ဘယ်ချိန်ပြန်ရောက် မယ်ဆိုတာကိုလည်း ပြောထားပါ။
- ကိုယ်သွားမဲ့ နေရာ နှင့် သွားမယ့် လမ်းကြောင်းကို လေ့လာ သိရှိထားပါ။ အသွား နှင့် အပြန်ကော ကြိုတင်စီစဉ်ထားပါ။
- အရက် အတူ သောက်မယ်ဆိုရင် အလွန်အကျွန် မသောက်ပါနဲ့။ ကိုယ့်ရဲ့ ခွက်ကို လက်လွှတ်စပယ် မထားပါနဲ့။ ဆေးတစ်ခုခု ထည့်သွားနိုင်ပါတယ်။
- အရေးအကြောင်းအတွက် ကိုယ့်ရဲ့ ဖုန်းကို အားအပြည့်သွင်းထားပါ။
- တစ်ခုခု မူမှန်ဘူးလို့ သတိထားမိရန် ချက်ချန်း ချိန်းတွေ့တာကို ရပ်ပြီး ပြန်သင့်ပါတယ်။

ကဲ နောက်ဆုံးတစ်ခုကတော့ ကိုယ်က သူ့ရဲ့ နောက်ကြောင်းသမိုင်း နှင့် ကျန်းမာရေး အခြေအနေကို မသိသေးပဲနဲ့ လိင်ဆက်ဆံမယ်ဆိုရင်တော့ ကွန်ဒုံးသုံးဖို့ လုံးဝ မမေ့ပါနဲ့။ ကွန်ဒုံး မပါပဲနဲ့ ဘာမှာ လုပ်ဖို့ မရှိဆိုတာ သူ့ကို ပြောပြလိုက်ပါ။

ဒီလိုဆိုရင်တော့ ဘေးကင်းပြီး ပျော်ရွင်တဲ့ ချိန်းတွေးတဲ့ အတွေ့အကြုံလေးကို ရရှိမှာပဲ ဖြစ်ပါတယ်။

လူကောင်းတွေနှင့် တွေ့ပြီး ကိုယ်နဲ့ တကယ်ရေစက်ပါတဲ့ ဖူးစာနှင့် တွေ့နိုင်ကြပါစေ။

0 comments Labels: Relationship, ချိန်းတွေ့, မေတ္တာရေး

ပထမဆုံး ချိန်းတွေ့တဲ့အချိန်မှာ ရှောင်သင့်တဲ့ အချက်များ

သင်ဟာ ကောင်လေးတစ်ယောက်နှင့် အဆင်တော့ပြေနေပြီ၊ အခု သူနှင့် အပြင်မှာ ပထမဆုံးအကြိမ် ချိန်းတွေ့တော့မယ်ဆိုတော့ သင်ဘာတွေလုပ်သင့်သလဲ။ ကိုယ့်အနေနှင့် ဟန်ဆောင်ကင်းပြီး ကိုယ်ပိုင်ဟန်လေးနှင့် ရှိသင့်တာတော့မှန်ပေမယ့် တခြားသူ အခက်မတွေ့ရလေအောင် ကိုယ့်ဘက်က အားနာမှုလေးနှင့် ထိန်းထိန်းသိမ်းသိမ်းလေး လုပ်ရမယ့် အချက်လေးတွေတော့ရှိပါတယ်။ ဒါမှလည်း သူက သင့်ကို နောက်တစ်ကြိမ် ထပ်တွေ့ချင်မှာပေါ့။

၁) နောက်ကျတာ
လမ်းပိတ်မယ်ထင်ရင် ကြိုထွက်ပေါ့နော်။ စောရောက်နေလို့ နည်းနည်းစောင့်ရတာ ကိစ္စမရှိပါဘူး။ ဒါပေမယ့် ချိန်းတဲ့အချိန်ထက် အများကြီးနောက်ကျသွားတာကတော့ သူ့အတွက် တကယ်စိတ်ပျက်စရာပါပဲ။

၂) သေချာ ဖီးလိမ်း ဝတ်ဆင်မလာတာ။
စွတ်ကျယ်တို့ ဘောင်းဘီတိုတို့နဲ့ ရောက်လာတာက သင်ကလွတ်လပ်မှုကို ပြချင်တာဆိုတာတော့ ဟုတ်ပါတယ်။ ဒါပေမဲ့ အသေအချာလေး ဝတ်ဆင်လာကမျိုးကျတော့ သင်က သူနှင့် တွေ့ဖို့ ဘယ်လောက် အလေးထားလာတယ်ဆိုတာကို ပြတော့ ပိုကောင်းတာပေါ့။

၃) ဖုန်း ခဏ ခဏ ကိုင်တာ၊ စစ်တာ
သင် သိပ်အလုပ်တွေများတယ်ဆိုတာကို သူနားလည်ပေးနိုင်မှာပါ။ ဒါပေမဲ့ ပထမဆုံး ချိန်းတွေ့တဲ့အခါမှာတောင် တချိန်လုံး ဖုန်းမှာစကားပြောလိုက်၊ စာရိုက်လိုက်ဆိုရင်တော့ နောက်လည်း သူ့ကိုအချိန်ပေးနိုင်မယ့်သူ မဟုတ်ဘူးဆိုတဲ့ သဘောကို ရောက်စေတာပါ့။

၄) ကြီးကျယ်တာ

စတွေ့အချိန်ကတည်းက သိပ်မကြွားပါနဲ့။ သူက သင့်ကို အထင်ကြီးချင်လို့ လာတွေ့တာမဟုတ်ပါဘူး။ သင့်ကို အခြားလူသားတစ်ယောက်လိုမြင်လို့ အနာဂတ်မှာ လက်တွဲနိုင်မယ့်သူတစ်ယောက် အဖြစ်လာတွေ့တာပါ။ ကိုယ်ဘယ်လောက်တော်ကြောင်း တစ်ဖက်သက်ကြီးပြောမနေပါနှင့်။ ဘယ်သူမှ တကိုယ်ကောင်းဆန်တဲ့ ချစ်သူကို မလိုချင်ပါဘူး။

၅) မယဉ်ကျေးတာ
လူတစ်ဦးနှင့် တစ်ဦးလေးစားတဲ့ အနေနှင့် ဒေသအလိုက် ယဉ်ကျေးတဲ့ အပြုအမူလေးတွေကို လုပ်ပြီး သူကို့ အထင်ကြီးအောင်လုပ်ပါ။ ညစ်ညစ်ပတ်ပတ် ကိုင်တွယ်စားသောက်တာတွေ၊ အမြင်ကတ်စရာ အပြုအမူတွေ သူစိတ်အနှောင့်အယှက်မဖြစ်အောင် ရှောင်ပေါ့။ အမှားလုပ်မိရင် တောင်းပန်တာက ချစ်ဖို့ကောင်းပါတယ်။

၆) အများကြီးစားတာ သောက်တာ

သူရှေ့မှာ မဆင်မခြင်စားသောက်နေတာကြီးက မြင်ရတာ စိတ်ပျက်စရာကြီးပါ။ ဘီယာတွေ မူးရူးအောင်သောက်နေရင်တော့ သူသင့်ကို ထားပြီးထွက်မပြေးတာ ကံကောင်းတယ်လို့ ဆိုရပေမယ်။ ဆင်ဆင်ခြင်ခြင်သောက်စားပြီး ကျန်းမာရေးကို ဂရုစိုက်တဲ့ ယောက်ျားတစ်ယောက်လို့ ကိုယ့်ကို မြင်လာအောင် နေထိုင်ပြတာဟာ ရေရှည်အတွက်ပါ သင့်ကို သူအကောင်းမြင်လာမှာပါ။

၇) ရှေးဟောင်းနှောင်းဖြစ် ရည်းစားဟောင်းတွေအကြောင်း ပြောတာ။
သူ့နှင့် သင့်ရဲ့ချိန်းတွေ့မှုကို ဒီတကြိမ်တည်းဖြစ်ချင်ရင် အရင်တုန်းက ရည်းစားဘယ်နှယောက်ရှိကြောင်း သင်အိပ်ယာထဲမှာ ဘယ်လောက်တော်ကြောင်းပြောလိုက်ပါ။ ကံကောင်းရင် သူနှင့် တစ်ညတာကိစ္စနှင့် ပြီးရင်ပြီးသွားမယ်။

ဒါပေမဲ့ သူ့ကို ရေရှည်မှန်းထားရင်တော့ သူသိသင့်သလောက်ပဲပြောရင် ရပါပြီ။ အကောင်းဆုံးကတော့ အတိတ်ကို အတိတ်မှာပဲ ထားခဲ့တာပါ။

၈) သူ့ကို တွေ့တွေ့ချင်း ချစ်တယ်ပြောတာ။

ကိုယ်တစ်ခါမှ မတွေ့ဘူးတဲ့ သူစိမ်းတစ်ယောက်က ကိုယ့်ကို အရူးအမူးချစ်နေပါတယ် ပြောတာလောက် လန့်ဖို့ကောင်းတာ မရှိဘူး။ ဒီလူစိတ်မှန်ရဲ့လားဆိုပြီး နောက်တစ်ခေါက်ထပ်မတွေ့ရဲရင်တော့ ခက်မယ်။ နောက်တစ်ခုက အချစ်လေးတို့၊ အသည်းလေးတို့၊ ဆွဲနမ်းလိုက်မှာနော်တို့ ပါးစပ်မသရမ်းပါနှင့်။ တဖက်လူကို လေးစားမှပေါ့။ ကိုယ့်လူရဲ့ အကျင့်လေးတွေ သတိထားပေါ့။

၉) ချိန်းတွေ့နေတုန်း တခြားတစ်ယောက်ကို ငန်းတာ။
သူနဲ့ ချိန်းတွေ့ပြီးတော့ သူကိုပဲ ရေရှည် ရည်ရွယ်ချက်ရှိတယ်ဆိုရင် ခပ်လန်းလန်း ယောက်ျားတစ်ယောက် ဖြတ်သွားလို့ ပြူးပြဲမကြည့်ပါနှင့်။ သင့်အတွက် အခုလည်း သူက တစ်ယောက်သောသူဖြစ်တော့မှာ ဖြစ်သလို နောင်လည်း သူပဲဖြစ်မှာပါ။ ပွဲစကတည်း သင့်ရဲ့ သစ္စာရှိမှကို သံသယဖြစ်အောင် မလုပ်မိပါစေနှင့်။

၁၀) သူပြီး နောက်တစ်ယောက်ကို ချိန်းဖို့ စီစဉ်ထားတာ။
လူတစ်ယောက်နှင့် ပထမဆုံးအကြိမ်ချိန်းတွေ့တာဟာ အလုပ် အင်တာဗျူးခေါ်သလို မဟုတ်ပါဘူး။ ဒီတစ်ယောက်နှင့် တွေ့တာမှ ၁ နာရီမှ မကြာသေးဘူး မကြိုက်လို့ နောက်တစ်ယောက်ကို ဆက်တွေ့မယ်ဆိုတာက လွန်လွန်းပါတယ်။ အနည်းဆုံးတော့ သူနှင့် အဆင်မပြေဖြစ်ရင် လေးလေးစားစား နှုတ်ဆက်ပြီးမှ နောက်တစ်ပွဲဆက်ဖို့ စဉ်းစားပေါ့။

၁၁) ပိုက်ဆံမပါဘဲ သွားတာ။
ကိုယ် အားရပါးရ စားပြီးသောက်ပြီး သူ့ကို ရှင်းစေချင်တဲ့ပုံစံနဲ့ မသိချင်ယောင်ဆောင် မနေပါနဲ့။ တကယ်အောက်ပါတယ်။ အနည်းဆုံးတော့ ကိုယ်ရှင်းမပေးချင်ရင် တစ်ဝက်တော့ပေးဖြစ်အောင် ကျိုးစားပါ။ သူက အတင်းရှင်းပေးသွားရင်တော့ နောက်တစ်ကြိမ် ကိုယ်ရှင်းပါမယ်ဆိုတာကို ကတိပေးပါ။ ဒါမှလည်း နောက်တစ်ကြိမ် ထပ်တွေ့ရတော့မှာပေါ့။

ကဲ… နောက်ဆုံးအနေနှင့် အရေးကြီဆုံးကတော့

ကိုယ်တစ်ခါမှ မသိတဲ့သူနှင့် ပထမဆုံး ချိန်းတွေ့တော့မယ်ဆိုရင် အများသွားလာကြတဲ့ နေရာတွေမှာ ချိန်းပါ။ သင့်လုံခြုံရေး အတွက်ပါ။ ဖြစ်နိုင်မယ်ဆိုရင် သင်သွားတွေ့မယ်ဆိုတာ အချိန်နှင့် နေရာကို ရင်းနှီးသူတစ်ဦးကို ပြောထားပါ။ စတွေ့တွေ့ခြင်း သူ့ကို အပြည့်အဝမယုံကြည်ဘူးဆိုရင် ကိုယ့်ရဲ့ အိမ်နေရာတို့ အလုပ်နေရာတို့ စတဲ့အချက်တွေနှင့် အထူးသဖြင့် သင့် ဘဏ်အချက်အလက်တွေကို မပြောမိအောင် ရှောင်ပါ။

ကဲ... ဘေးကင်းပြီး အဆင်ပြေတဲ့ လက်တွဲဖော်ကိုရှာတွေ့ပါစေ။

0 comments Labels: grindr, Relationship, ချိန်းတွေ့, မေတ္တာရေး

Online Dating Profile ကောင်းကောင်း ဘယ်လိုဖွင့်မလဲ။

အင်တာနက်သုံးပြီး ချစ်သူရှာဖို့ ရည်ရွယ်နေပါသလား။ ကျွန်တော်တို့ ဂေးတွေ အများသုံးကြတဲ့ phone က app တွေ ဖြစ်တဲ့ jack'd တို့ grindr သုံးပြီး ချစ်သူရှာမလား၊ ဒါမှမဟုတ် dating website တွေမှာ account ဖွင့်မလား၊ မဟုတ်ရင် facebook ကနေပဲ ရှာမလား။ ဒါပေမဲ့ ပထမဆုံးခြေလှမ်းက profile ကောင်းကောင်းလေးဖွင့်ပြီး ကိုယ့်ကို စိတ်ဝင်စားလာအောင် ဘယ်လိုလုပ်မလဲ။ ကိုယ့် profileမှာ ဘယ်လိုပုံ သုံးမလဲ။ ကဲဒီနည်းလမ်းလေးတွေ စမ်းကြည့်လိုက်ပေါ့။

၁။ ကိုယ့်မျက်နှာ အကောင်းဆုံးပေါ်တဲ့ ပုံကို သုံးပါ။

ကိုယ့်ကိုကိုယ် ကိုယ်မဟုတ်ဘူးလို့ ယူဆလိုက်ပါ။ ကိုယ့်ပုံကိုပြန်ကြည့်ပြီး ကျွန်တော်ဆိုရင် ဒီပုံထဲက ကောင်လေးနဲ့ တွဲမလားဆိုပြီး ပြန်စဉ်းစားကြည့်ပါ။ သင့်ရဲ့ ဓာတ်ပုံက ဒီအချက်နှစ်ချက်တော့ပြောပြနေပါစေ - “ကျွန်တော့် တကယ့်ပုံပါ” ပြီးတော့ “ကျွန်တော့်မှာ ပင်ကိုယ်စရိုက်ရှိပါတယ်။”

ဓာတ်ပုံ အနည်းဆုံး လေးပုံနှင့် အထက်ရှိတဲ့ သူတွေက online မှာ ချစ်သူရှာရတဲ့ အတွေ့အကြုံကောင်းကောင်း ရတယ်လို့ ပြောကြပါတယ်။ အဲ့ဒီအထဲမှာ အဓိကဓာတ်ပုံကိုတော့ သင့်မျက်နှာကို မနီးမဝေး (medium shot) က ရိုက်ထားတဲ့ ပုံကို သုံးပါ (close-up လိုသိပ်မကပ်စေပါနှင့်)။ ကိုယ့်မျက်နှာရဲ့ ဘယ်ဘက်အခြမ်းကို ပေါ်လွင်တဲ့ပုံက ပိုကောင်းပါတယ် လို့ပြောပါတယ်။

၂။ သင့် သူငယ်ချင်းတွေ ပုံထဲက ဖယ်ထားပါ။

သူငယ်ချင်းတွေနဲ့ ရိုက်ထားတဲ့ ပုံကတော့ တင်ချင်စရာပါ။ အင်းပြောရမယ်ဆို သင့်မှာ အခြွေအရံ အပေါင်းအသင်းများပြီး ဆက်ဆံရေးကောင်းတယ်ဆိုတာ ပြတာတော့ ဟုတ်ပါပြီ။ ဒါပေမဲ့ တခြားချောတဲ့ ကောင်လေးတွေ သင့်ကို ဝန်းရံထားတော့ သင့်ကို စကားလာ ပြောချင်တဲ့ လူက ဘယ်လိုလာ ချဉ်းကပ်ရဲရမလဲ။ ပြီးတော့ သင်က ဘယ်တစ်ယောက်လဲဆိုတာ ဘယ်လိုသိမလဲ။ တော်ကြာ ကိုယ့်ကို မကြိုက်ပဲ သင့်သူငယ်ချင်းကို မျက်စိကျသွားရင် ဒုက္ခ။

၃။ selfie သုံးရင်ကောင်းမလား

ဥပမာ သင့် profile မှာ ပုံ ၄ ပုံရှိတယ်ဆိုပါဆို့။ အနည်းဆုံး ၂ ပုံလောက်ကတော့ selfie ပုံ မဖြစ်သင့်ပါဘူး။ ကိုယ့် ဓာတ်ပုံတွေက ကိုယ့် ဘဝကို တကယ်ပြတဲ့ ပုံတွေဖြစ်သင့်ပါတယ်။ ခရီးသွားရတာ ကြိုက်လား၊ ဒါဆို နောက်တစ်ခေါက် လမ်းရောက်ရင် ကိုယ့်သူငယ်ချင်းကို ဓာတ်ပုံတစ်ပုံလောက်တော့ ရိုက်ခိုင်း။ ပင်လယ်ကမ်းခြေမှာ ရေကူးဝတ်ဆုံနဲ့ ဓာတ်ပုံက သင့်အိမ်ကရေချိုးခန်းထဲက အတွင်းခံ ဘောင်းဘီ နဲ့ပုံထက်တော့ သာပါတယ်။

၄။ ကိုယ်မကြိုက်တဲ့ အရာတွေကို ပြောမယ့်အစား ကြိုက်တဲ့ အရာတွေကို ပြောပါ။

“ကျွန်တော်သည် အားကစားလုပ်ရတာကြိုက်ပြီး ကျန်မာရေးလိုက်စားတဲ့သူကို သဘောကျတယ်” လို့ပြောခြင်းက “ဝတဲ့သူကို မကြိုက်”လို့ ပြောတာထက်အများကြီးသာပါတယ်။ ယဉ်ယဉ်ကျေးကျေးနဲ့ ကိုယ်လိုချင်တာပြောတာက တခြား ကိုယ့်profileလာကြည့်တဲ့သူတွေကို ထိခိုက်ရာမရောက်ပါဘူး။ အထူးသဖြင့် "နွဲ့တဲ့သူမကြိုက်"တို့ "ဟိုလူမျိုးဒီလူမျိုးအလိုမရှိ"လို့ ရေုးခြင်းက ကိုယ့်ကိုကိုယ် စိတ်ထားသေးသိမ်တဲ့လူလို့ ပေါ်လွင်စေပါတယ်။ ဘယ်သူမှ သဘောမကောင်းတဲ့ လူနှင့် ချိ်န်းမတွေ့ချင်ပါဘူး။

၅။ လူတိုင်းပြောတဲ့ အပြောတွေရှောင်ပါ။

ဥပမာ သီချင်းကြိုက်တယ်၊ ရုပ်ရှင်ကြိုက်တယ်လို့ရေးရင် စိတ်ဝင်စားဖို့ကောင်းမလား။ အဲ့ဒါတွေ ဘယ်သူကေကော် မကြိုက်လို့လဲ။ အဲ့လိုမဟုတ်ပဲ ကျွန်တော်က Minions ရုပ်ရှင်ကို အရမ်းကြိုက်တယ်၊ ခေတ်ဟောင်းအဆိုတော်တွေကို အများကြီးနားထောင်တယ်လို့ ရေးထားတာကမှ ကိုယ့် profile ကို လာကြည့်သူကို ကိုယ့်အကြောင်း နည်းနည်းပို သိသွားစေတာပေါ့။

အဲ့လိုပါပဲ စပြီးစကားပြောတဲ့ အခါ၊ hi တို့ hello တို့နှင့် စပြောရင် သိပ်ပြီး စိတ်ဝင်စားစရာ မကောင်းဘူး။ သူ့ရဲ့ profile ကိုသေချာဖတ်ပြီး သူရေးထားတာ တစ်ခုခုနှင့် ပက်သက်တဲ့ စကားတစ်ခုခုနှင့် စပြောရင်တော့ ကိုယ့်ကို သတိထားမိသွား နိုင်ပါတယ်။

ကဲချစ်သူတွေ ရှာတွေ့နိုင်ကြပါစေ။

0 comments Labels: Relationship, ချိန်းတွေ့, မေတ္တာရေး

သူနဲ့ ပထမဆုံးအကြိမ် ချိန်းတွေ့တော့မယ် ဆိုရင်

ကဲ… သူနဲ့ ဖုန်းက dating app မှာ ဒါမှသို့မဟုတ် Facebook မှာ စကားတွေပြောနေကြတာ အဆင်တွေပြေနေပြီ။ နောက်ဆုံးတော့ ~~ကိုယ်အောင့်ထားတဲ့~~ ကိုယ်လန့်နေတဲ့ ချိန်းတွေ့တော့မယ့် အချိန်ကျရောက်လာပါပြီ။ ပထမဦးဆုံးတွေ့တဲ့အချိန်လေး ချောမွေ့သွားအောင် ဘယ်လိုလုပ်မလဲ။

အရင်ဆုံး… ဘာဝတ်သွားရင် ကောင်းမလဲ။

၁) အလွှာလေးတွေနဲ့ ထပ်ဝတ်သွားပါလား။ ဒါဆိုရင် ပူလာရင်၊ မွန်းကျပ်လာရင် ချွှတ်လိုက်ရုံပဲ။ ချမ်းရင် ပြန်ထပ်လိုက်။

၂) သွားမယ့်နေရာနဲ့ ကိုက်ညီတဲ့ဟာ ၀တ်သွားပါ။

၃) သက်တောင့်သက်တာရှိမယ့် ဖိနပ်စီးသွားပါ။

၄) နည်းနည်းဖော်ဝတ်သွားပါ။ အများကြီးမဟုတ်ဘူးနော်။

၅) အမြင်ကတ်လောက်စရာကောင်းအောင်တော့ မဝတ်နဲ့ပေါ့။

၆) ဒါပေမယ့် ကိုယ့်ရဲ့ ကိုယ်ပိုင်မူဟန်ကို မပျက်စေနဲ့လေ။

၇) ဆံပင်ကို အကောင်းဆုံးဖြစ်အောင် ပြင်ဆင် ဖီးလိမ်းသွားပါ။

၈) ကိုယ့်ရဲ့ အကောင်းဆုံး အပိုင်းတွေ ပေါ်လွင်ပါစေ။

အမလေး... သူရောက်လာပြီ။ ဘာ ဆက်လုပ်ရမှာလဲ။

ပထမဆုံး စတွေ့ကြပြီဆိုရင် စကားပြောရတာ တခါတလေ နေရခက်ပြီး ပြောစရာ ရှာမတွေ့တာမျိုးဖြစ်နိုင်ပါတယ်။ ဘာကြောင်းတွေပြောရင် ကောင်းမလဲဆိုတဲ့ အကြံဉာဏ်ကောင်းလေးတွေပါ။

၁) ရုပ်ရှင်အကြောင်းတွေအစား ခရီးသွားတဲ့အကြောင်း ပြောပါ။ ခရီးသွားတဲ့ အကြာင်းတွေကို ပြောမယ်ဆိုရင် ပျော်စရာကောင်းခဲ့တဲ့ အချိန်တွေ၊ အားလပ်ရက်တွေ နှင့် ကိုယ့်ရဲ့ အိမ်မက်နေရာတွေကို ပြန်သတိရစေတဲ့ အတွက် လူတွေကို စိတ်ရွင်လန်းစေပါတယ်။ အဲ့ဒီတော့ တစ်ယောက်နဲ့တစ်ယောက်က ဆွဲဆောင်မှုတွေလည်း ပိုကောင်းလာပါတယ်။

၂) နေ့စဉ်ဓူဝ ပျင်းစရာအကြောင်းတွေအစား ဆန်းကျယ်တဲ့ကြောင်းတွေပြောပါ။ နိုင်ငံရေးအကြောင်း ပြောမလား၊ ရတယ်။ သာမာန်နေ့စဉ်အကြောင်းတွေဖြစ်တဲ့ ရာသီဥတုတို့၊ ဒီနေ့ဘာနဲ့စားလဲတို့ အကြောင်းတွေအပါအဝင် ကိုယ့်မှာ မောင်နှမ ဘယ်နှစ်ယောက်ရှိလဲဆိုတာတွေက ဘာမှအားစိုက်ရတာ မပါတဲ့အတွက် စကားဝိုင်းကို ဆက်လက်ထိန်းသိမ်းထားနိုင်စွမ်း မရှိပါဘူး။ တကယ်လို့ လက်ရှိစျေးကွက်အခြေအနေတို့၊ ကားလမ်းပိတ်ဆို့အကြောင်းတို့ စတာတွေပြောလျှင် ဆွေးနွေးစရာ ရလာပါတယ်။ တကယ်လို့ အမြင်တွေတူနေခဲ့ရင် ပြောဆုံးမှာ မဟုတ်တော့ပါဘူး။ ပိုပြီးအားရစေတဲ့ အတွေ့အကြုံကို ရစေပါတယ်။

၃) ကိုယ့်အတွင်းရေးလေး တချို့ကို ဖလှယ်ပါ။ ခံစားချက်နှင့် ဆိုင်သော၊ ကိုယ်ရေးကိုယ်တာနှင့် ဆိုင်သော အချက်တွေကို ပထမဆုံးချိန်းတွေ့အချိန်မှာ ဝေမျှခြင်းသည် တကယ်ပင် အားကောင်းစွာချိတ်ဆက်တဲ့ ခံစားမှုကို ပေးနိုင်ပါတယ်။ သူနှင့် အဆင်ပြေပြီ၊ သူ့ကိုလည်း သဘောကျတယ်၊ နောက်တစ်ခေါက်လောက် ထပ်တွေ့ဖို့ရည်ရွယ်ထားတယ် ဆိုလျှင် ကိုယ့်ရဲ့ အတွင်းရေးတွေကို တရင်းတနှီး ပြောပြလို့ရပါတယ်။ ကိုယ် ကျောင်းတုန်းက အရှက်ကွဲခဲ့တာတွေ၊ ကိုယ်လုပ်ခဲ့ဖူးတဲ့ စွန့်စားမှုတွေထဲက အကွဲကွဲအလွဲလွဲအဖြစ်တွေက အစ ကိုယ်ကြောက်တဲ့အရာတွေ အဆုံး ကိုယ်က လူတစ်ယောက်ကို သာမှန်ဆိုရင်မပြောမယ့် အကြောင်းတွေကို သူ့ကို ပြောပြလို့ရပါ။ ကိုယ့်အဖြစ်ကို ပြန်တွေးပြီးရယ်ရင်း သူကပါ လိုက်ရယ်လို့ရပါတယ်။ ခဏအတွင်းဖြစ်သွားတဲ့ ချိတ်ဆက်မှုက တစ်သက်လုံး အမှတ်ရသွားစေပါတယ်။

၄) တူညီတဲ့အချက်လေးတွေ အလေးပေးပြီးပြောပါ။ လူတွေက ကို်ယ်နဲ့တူတဲ့သူတွေကို ကြိုက်တယ်ဆိုတာ အထူးပြောစရာတော့ မလိုပါဘူးနော်။

၅) သတိထားရမယ့်အချက်တစ်ခုကတော့ ကိုယ် ဘာအကြောင်း ပြောတာထက် ဘယ်လိုပုံစံမျိုးပြောတာက ပိုအရေးကြီးပါတယ်။ တစ်ဖက်ထဲကပဲ သီးသန့်ပြောနေတာမျိုး မဖြစ်ပါစေနဲ့။ ကိုယ်ကကြီးပဲ အပိုင်းစီးထားတာကို လုံးဝရှောင်ကြဉ်ပါ။ စကားပြောရာတွင် လွှမ်းမိုးမထားပါနှင့်။ ဒါပေမဲ့ ကိုယ်က ဘာမှမပြောတဲ့သူလည်း မဖြစ်ပါစေနှင့်။

၆) သူစိတ်ဝင်စားစေမယ့် အချက်တွေကို ပြောစေဖို့ အခွင်းအလမ်း ဖန်တီးပေးပါ။ စကားပြောရမှာ အခက်အခဲရှိတဲ့သူတွေ အများဆုံးတွေးမိတာက ငါဘာအကြောင်းပြောရမလဲ ဆိုတာပါ။ အဲ့လိုတွေးတာမှားပါတယ်။ အမှန်တကယ် ကိုယ့်ကိုယ်ကို မေးရမှာက သူတို့စိတ်ဝင်စားတာတွေ ပြောလာအောင် ဘယ်လိုလုပ်ပေးရမလဲဆိုတာပါ။ လူတွေနဲ့ အဆင်ပြေချင်ရင် ကိုယ့်အကြောင်းတွေကြီးပဲ ပြောဖို့ မလုပ်ပါနဲ့။ နားထောင်ကောင်းသူတစ်ယောက် ဖြစ်အောင်ကြိုးစားပါ။

တခြား မှာစရာလေးတွေကတော့...

၁) ဖုန်းက jack'd ပဲဖြစ်ဖြစ် grindr ပဲဖြစ်ဖြစ်၊ အကုန်ပိတ်ထားပါ။ သူနဲ့ အဆင်ပြေနေတုန်း ကိုယ့်ဖုန်းက တခြားကောင်လေးတွေပို့တဲ့ စာတွေ တဝီဝီနဲ့ လာနေတာလောက် သူ့အတွက် စိတ်ကသိကအောက်ဖြစ်စေတာ မရှိပါဘူး။

၂) ခုမှစတွေ့ချိန်းတွေ့ခဲ့တဲ့သူနဲ့ အလျှင်စလို Facebook မှာ သူငယ်ချင်းသွား မလုပ်လိုက်ပါနဲ့ဦး။ တော်ကြာသူနဲ့ အဆင်မပြေတဲ့အခါ (တွေ့တိုင်းအဆင်ပြေတာမှ မဟုတ်တာနော့) သူ့ကို ပြန်ဖျက်ရမလား ဒါမှမဟုတ် သူတင်သမျှ သူအသဲကွဲတဲ့ အကြောင်းတွေပဲ လိုက်ဖတ်နေရမလားဆိုတဲ့ အဖြစ်ရောက်သွားဦးမယ်။

အားလုံးထဲမှာ အရေးကြီးဆုံးကတော့…

ကိုယ့်ရဲ့ ပင်ကိုယ်စရိုက်ကို ဖော်ပြပါ။ မဖုံးကွယ်ပါနဲ့။ သူမကြိုက်လျှင် သူနဲ့ကိုယ့်အချိန်တွေ အကုန်ခံနေစရာ အကြောင်းမရှိပါဘူး။

တွေ့ပြီး အဆင်မပြေလို့ ပြန်လာရင်လည်း ဘာမှ စိတ်မညစ်ပါနဲ့။ အင်တာနက်လေး ပြန်ဖွင့်ပြီး နောက်တစ်ယောက် ရှာလိုက်ပေါ့။ ၁ ယောက်သွားရင်၊ ၂ ယောက်ရှာ၊ ၃ ယောက်ဆိုရင် ပျော်စရာကြီးပေါ့ ဟိဟိ။

ကဲဘာပဲဖြစ်ဖြစ်… ပထမဆုံး စတွေ့တဲ့ အချိန်မှစ၍ တကယ်ပဲ လက်တွဲနိုင်တဲ့ ချစ်သူရည်းစားများ ရနိုင်ကြပါစေ။

Rss:

Top

လုလင်

Search

Pages

Content

ပထမဆုံးချိန်းတွေ့တဲ့အချိန်မှာ အနာဂတ်ချစ်သူကို ဘယ်လိုပိုးပန်းမလဲ

ပထမဆုံးချိန်းတွေ့တဲ့အချိန်မှာ အနာဂတ်ချစ်သူကို ဘယ်လိုပိုးပန်းမလဲ

အင်တာနက် ဖူးစာရှာဖွေခြင်းနှင့် ဘေးကင်းလုံခြုံရေး

အင်တာနက် ဖူးစာရှာဖွေခြင်းနှင့် ဘေးကင်းလုံခြုံရေး

ပထမဆုံး ချိန်းတွေ့တဲ့အချိန်မှာ ရှောင်သင့်တဲ့ အချက်များ

ပထမဆုံး ချိန်းတွေ့တဲ့အချိန်မှာ ရှောင်သင့်တဲ့ အချက်များ

Online Dating Profile ကောင်းကောင်း ဘယ်လိုဖွင့်မလဲ။

Online Dating Profile ကောင်းကောင်း ဘယ်လိုဖွင့်မလဲ။

သူနဲ့ ပထမဆုံးအကြိမ် ချိန်းတွေ့တော့မယ် ဆိုရင်

သူနဲ့ ပထမဆုံးအကြိမ် ချိန်းတွေ့တော့မယ် ဆိုရင်

မာတိကာ

ခေါင်းစဉ်များ

Disclaimer

လတ်တလော အဖတ်များသော စာများ

၂၁ ရာစုနှစ်တိုင် လိင်တူချစ်သူတို့၏ သမိုင်းကြောင်း နှင့် ဘဝ

ဆက်သွယ်ရန်

LGBT အဓိပ္ပာယ်